Türkiyədən idxal edilən pomidorlar ixracatçı ölkəyə geri qaytarılıb.

Bu barədə məlumatı Gürcüstanın Gəlirlər Xidməti yayıb.

Qurumun açıqlamasına görə, Maliyyə Nazirliyinin Gəlirlər Xidmətinin "Sarpi" gömrük-keçid məntəqəsində Türkiyə Respublikasından gətirilmiş, ümumi çəkisi 32 039 kq olan iki partiya pomidor sərhəddə saxlanılıb.

Gəlirlər Xidmətinin yaydığı məlumatda qeyd olunur ki, sərhəd-karantin nəzarət prosedurları çərçivəsində məsul fitosanitar müfəttiş tərəfindən məhsulun yoxlanılması zamanı pomidorlarda karantin zərərvericisinə – Tuta Absoluta (istixanada pomidorların mədəndəyişən güvəsi) xas izlər aşkarlanıb.

Bu səbəbdən, məhsulun ixracatçı ölkəyə geri qaytarılmasına qərar verilib.

Qeyd edək ki, Gürcüstana idxal edilən pomidorların 96%-i məhz Türkiyədən gəlir. Milli Statistika İdarəsinin məlumatına görə, cari ilin yanvar-mart aylarında Gürcüstana ümumilikdə 7 522 ton (5.358 milyon ABŞ dolları) pomidor idxal olunub, bunun 7 224 tonu Türkiyədən gətirilib.

Daha dəqiq desək, pomidor idxal edən ölkələrin siyahısı belədir:
• Türkiyə – 7 224 ton (5.140 milyon ABŞ dolları)
• Azərbaycan – 235.21 ton (156.92 min ABŞ dolları)
• İran – 51.93 ton (36.37 min ABŞ dolları)
• İspaniya – 7.2 ton (14.87 min ABŞ dolları)
• Niderland – 3.05 ton (9.77 min ABŞ dolları)