Saqareco rayonunun Keşəli kəndindən olan Aydın Həmzəyevin qətlində şübhəli bilinən şəxs yaxınlarının etirazından sonra Daxili İşlər nazirliyinin əməkdaşları tərəfindən saxlanılıb.

13 may tarixində Tbilisidə, Baş Prokurorluğun qarşısında keçirilən aksiyada Həmzəyevlər ailəsi 2022-ci ilin sentyabrın 21-də qətlə yetirilən Aydın Həmzəyevin qatilinin hələ də azadlıqda olmasına etiraz edirdilər. Prokurorluq qarşısında keçirilən aksiyada “Meydan Tv”yə müsabəsində Aydın Həmzəyevin qardaşı Azad Həmzəyev bildirmişdi ki, qətllə bağlı videokadrlar və DNT analizləri var.

“Ondan sonra mənə dedilər ki, bu işi kimin etdiyini biz bilirik. Bizə 15-20 gün vaxt ver. Bu iri qruplaşma olduğu üçün, qatildən başqa bir neçə nəfəri də həbs etməliyik. Ona görə bizə vaxt lazımdır. Qatili həbs etsək o birilər qaçacaqlar. 20 gün gözlədim, 20 gündən sonra bir həftə, 10 gün yenə gözlə dedilər. Aldada-aldada 2 il 8 aydır gözləyirik ki, bu işi açacaqlar. Nə o insanı danışdırmırlar ki, siz həmin saatda orada nə edirdiniz, hadisə yerindən maşın qaçırdılıb. İstintaqı tamamilə dayandırıblar”, - Azad Həmzəyev vurğulayıb.

15 may tarixində Daxili İşlər Nazirliyi Aydın Həmzəyevi qətlə yetirən şəxsin həbs olunması barədə məlumat yayımlayıb. Bildirilir ki, 1971-ci il təvəllüdlü M.A. qəsdən adam öldürmə və odlu silahın qanunsuz daşınması ittihamı ilə saxlanılıb.

İstintaq Gürcüstan Cinayət Məcəlləsinin 108-ci (qəsdən adam öldürmə) və 236-cı (odlu silahın qanunsuz əldə edilməsi və daşınması) maddələri ilə aparılır.

Cinayət, 15 ilə qədər azadlıqdan məhrumetməni nəzərdə tutur.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---