Müxalifətçi lider (“Dəyişiklik Koalisiyası”) Nika Melia bildirib ki, 29 mayda onun əleyhinə keçiriləcək məhkəmə iclasına – Tbilisi Şəhər Məhkəməsinə getməyəcək.

O, bu barədə “TV Pirveli”nin efirində danışıb.

29 mayda məhkəmə, “Gürcü Arzusu” tərəfindən yaradılmış parlamentin müvəqqəti istintaq komissiyasında Nika Melianın ifadə verməyə gəlməməsi səbəbindən başlanan cinayət işinə baxacaq. Melia gözləyir ki, həmin gün ona təyin olunmuş girovun həbs cəzası ilə əvəz olunması məsələsi də müzakirəyə çıxarılacaq.

“Mən qərar verdim ki, ora getməyim. Niyə? – xalqın şərəfi naminə. Mən bu gün gördüm ki, qadınlara, yaşlılara, gənclərə necə davranılır – istəmirəm bu təkrarlansın. Əminəm ki, əgər Zura [Caparidze] bunu əvvəlcədən bilsəydi, o da eyni qərarı verərdi,” – deyə Nika Melia bildirib və əlavə edib ki, iclasa onun vəkili qatılacaq:
“Həbsə hazırlaşmaq niyyətində deyiləm... Harada olacağam, bilmirəm.”

Tbilisi Şəhər Məhkəməsinin hakimi İrakli Şvanqiradzenin qərarına əsasən, siyasətçi Zura Caparidze məhkəmə zalında həbs olunub.
Nika Melia kimi, ona da “Gürcü Arzusu”nun istintaq komissiyasına getmədiyi üçün ittiham irəli sürülüb – Gürcüstan Cinayət Məcəlləsinin 349-cu maddəsinə əsasən, bu, cərimə və ya bir ilə qədər həbs cəzası nəzərdə tutur.

“Gürcü Arzusu” partiyası 5 fevralda “Vahid Milli Hərəkat” hökuməti dövrünü araşdırmaq üçün istintaq komissiyası yaratmışdı. Hökumət “Kollektiv Milli Hərəkat”ın qadağan edilməsini istəyir. Bu anlayışa o, 2024-cü ilin Parlament seçkilərində baryeri aşmış, hazırkı hakimiyyətin legitimliyini tanımayan əsas müxalifət partiyalarını daxil edir.

Komissiyaya ifadə verməyə gəlmədiklərinə görə aşağıdakı siyasətçilər barəsində cinayət işi açılıb və onlara girov təyin edilib:
• Nika Melia – 50,000 lari
• Mamuka Xazaradze və Badri Caparidze – hər birinə 50,000 lari
• Qivi Tarqamadze – 10,000 lari
• İrakli Okruaşvili – 20,000 lari
• Zura Caparidze – 20,000 lari
• Qiorqi Vaşadze – 50,000 lari
• Nika Qvaramia – 30,000 lari

İrakli Okruaşvili girov məbləğini ödəmədiyi üçün 14 mayda məhkəmə zalında həbs olunub. Dünən, 22 mayda isə eyni səbəblə Zura Caparidze həbs edilib. Girovu ödəmək niyyətində olmadıqlarını Nika Qvaramia və Nika Melia da bildiriblər.