11 iyun tarixində Gürcüstanın baş naziri İrakli Kobaxidze ilə Macarıstanın baş naziri Viktor Orban arasında keçirilən görüşdən sonra Orban özünün Facebook səhifəsində paylaşım edib.

Paylaşımda Orban qeyd edir ki, Kobaxidze ilə bu il artıq dördüncü dəfə görüşür və vurğulayır ki, Macarıstanla Gürcüstan arasında bir çox oxşarlıq mövcuddur. Onun sözlərinə görə, hər iki ölkənin məqsədi başqalarının müharibəsində “piyona” çevrilməməkdir.

“Macarlar kimi, gürcülər də öz talelərini özləri müəyyənləşdirmək və başqalarının müharibələrində alət olmamaq uğrunda mübarizə aparırlar”, – deyə Orban yazıb.

Orban paylaşımında 2008-ci il müharibəsinə də toxunub. Onun iddiasına görə, həmin vaxt Gürcüstanı müharibəyə “qlobalistlər” sürükləyib və sonradan onu tək buraxıblar. Orban bildirir ki, gürcülər bu hadisədən “dərs çıxarıblar”.

“Gürcülər 15 il əvvəl artıq yaşadılar – qlobalistlərin hay-küylü çağırışları ilə Rusiya ilə müharibəyə necə sürükləndiklərini və daha sonra onları bu yola salanların necə tərk etdiklərini. Bunun üçün böyük bədəl ödədilər və az qala milli müstəqilliklərini itirdilər. Gürcülər bu dərsi aldılar və indi qərarlıdırlar: artıq aldanmayacaqlar. Xarici qüvvələrə onları müharibəyə cəlb etməyə imkan verməyəcəklər”, – deyə Macarıstanın baş naziri bildirib.

Orban əlavə edib ki, gürcülər də macarlar kimi “Brüssel bürokratiyası qarşısında baş əyməkdən imtina edirlər”.

Onun sözlərinə görə, Macarıstan və Gürcüstanın inkişafına “Brüsselin şantajı və ya Ukraynadan qaynaqlanan təhlükə” mane ola bilməz:

“Biz iqtisadi imkanlar yaradırıq ki, müharibə və sanksiyaların vurduğu zərərləri kompensasiya edək. Biz bu imkanları yaradırıq, çünki Gürcüstan Macarıstanın enerji təhlükəsizliyinin möhkəmləndirilməsində vacib tərəfdaşdır. Biz imkanlar açırıq, çünki Gürcüstanın iqtisadiyyatı – Avropa İttifaqının iqtisadiyyatından fərqli olaraq – hər il 8-9% artımla dinamik şəkildə inkişaf edir.

Brüsselin təzyiqləri və ya Ukraynadan gələn təhlükələrə baxmayaraq, biz inkişafı, artımı və güclənməni davam etdirəcəyik, çünki macar və gürcü xalqları bizə bu məsuliyyəti etibar edib. İşə başlayaq!” – Macarıstanın baş naziri yazıb.

Bir neçə saat sonra Orban daha bir paylaşım edib: “Gürcüstanda da, Macarıstanda olduğu kimi, qlobalist, saxta vətəndaş cəmiyyəti təşkilatları hakimiyyəti devirmək üçün hər şeyi edirlər. Bizim mənəvi borcumuz onların yanında durmaqdır – necə ki, onlar bizim yanımızdadırlar.”

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---