Dmanisi Bələdiyyəsi fiziki imkanları məhdud olan uşaqlar üçün Gün Mərkəzi açıb və bu barədə yaydığı məlumatda yalnız bələdiyyənin töhfəsindən danışır. Məlumatda Avropa İttifaqının dəstəyi və tərəfdaşlığı haqqında heç nə qeyd olunmayıb. Baxmayaraq ki, məhz bu dəstək sayəsində mərkəz təmir olunub və avadanlıqla təmin edilib.

Dmanisidə 6-18 yaş arası fiziki imkanları məhdud olan uşaqlar üçün Gün Mərkəzi xidmətini göstərən “Uşaq, Ailə, Cəmiyyət” qeyri-hökumət təşkilatıdır. Bu təşkilat 2024-cü ildə Avropa İttifaqı tərəfindən maliyyələşdirilən layihədə iştirak edib və mərkəzin açılması üçün maliyyə alıb.

2022-ci ildən etibarən Kvemo Kartli bölgəsində “Post-COVID və bərpa üçün vətəndaş cəmiyyətinin gücləndirilməsi” layihəsi həyata keçirilir. Bu çərçivədə 2024-cü ildə sosial xidmətlərin və onlara əlçatanlığın yaxşılaşdırılmasına yönəlmiş QHT-lər üçün qrant müsabiqəsi elan olunub. CENN təşkilatının layihə meneceri Nino Tevzadze bildirir ki, “Uşaq, Ailə, Cəmiyyət” bu müsabiqədə qalib gəlib və maliyyələşmə əldə edib.

“‘Uşaq, Ailə, Cəmiyyət’ Dmanisi Bələdiyyəsində fiziki imkanları məhdud olan şəxslərə xidmət göstərəcək Gün Mərkəzinin yaradılmasına yönəlmiş çox maraqlı layihə təqdim etdi. Layihə yalnız fiziki məkanın qurulmasını deyil, həm də idarəetmə sisteminin qurulmasını, sənədlərin hazırlanmasını, əməkdaşların işə götürülməsi və standartlara uyğun olaraq təlimini nəzərdə tuturdu. Bundan əlavə, dövlət tərəfindən akkreditasiya almaq, kvota əldə etmək və ictimai maarifləndirmə kampaniyası da layihənin bir hissəsi idi.”

Tevzadzenin sözlərinə görə, Avropa İttifaqı Gün Mərkəzinin açılması üçün 9 590 avro məbləğində qrant ayırıb. Dmanisi Bələdiyyəsi isə təşkilata binanı təhvil verib və memorandum imzalayıb. O vurğulayır ki, mərkəzin açılışı üçün bələdiyyə maliyyə xərcləri etməyib.

Dmanisi meri Koba Muradaşvili “Marneuli” radiosuna bildirib ki, Avropa İttifaqı tərəfindən heç bir maliyyə yardımı göstərilməyib və mərkəz yalnız bələdiyyə ilə Səhiyyə Nazirliyinin əməkdaşlığı çərçivəsində açılıb. O, həmçinin xəbərdarlıq edib ki, şərhləri səhv təqdim olunarsa, hüquqi prosesə başlayacaq. Müvafiq olaraq Koba Muradaşvilinin müsahibəsini təqdim edirik.

“Biz hər şeyi sıfırdan başladıq – mən və sosial xidmət şöbəm və sona qədər çatdırdıq. Hansı maliyyə dəstəyi? Haradadır o dəstək? Kiminsə nəsə köçürdüyü mənə məlum deyil.”

Merin sözlərinə görə, Avropa İttifaqı ilə heç bir əlaqə olmayıb və onlar bələdiyyəyə qrant verməyib. O, ümumiyyətlə Avropa İttifaqının bu layihədə iştirak etdiyini bilmədiyini deyir.

“Avropa İttifaqının bununla nə əlaqəsi var? Hər şey tam olaraq bələdiyyənin maliyyələşməsi ilə baş verib. Üstəlik, Səhiyyə Nazirliyindən 15 vauçer almışıq.”

QHT “Uşaq, Ailə, Cəmiyyət”-in təsisçisi Maya Bibilaşvili isə bildirib ki, onlar mərkəzin açılması üçün Avropa İttifaqından maliyyə yardımı alıblar. Bələdiyyə tərəfindən təhvil verilən bina təmir edilib, avadanlıqla təchiz olunub və pandus quraşdırılıb. Onun sözlərinə görə, bələdiyyə layihə və donor barədə tam məlumatlı idi və hətta CENN-in layihəsində iştirak etməyi məhz meriya təklif edib.

“(Dmanisi meriyasının) məlumatı yox idi nə deməkdir, hətta birbaşa onların tövsiyəsi ilə bizə deyildi ki, CENN-in belə bir müsabiqəsi var. Meriyanın özü də bir neçə layihəni CENN-in dəstəyi ilə həyata keçirib. CENN bu xidməti Avropa İttifaqının layihəsi çərçivəsində həyata keçirirdi. Məhz onların göstərişi ilə biz onlarla əlaqə saxladıq və təmir xərclərinin ödənilməsi təklif olundu.”

Qeyd edək ki, bu, Dmanisi meriyasının Avropa İttifaqının maliyyə dəstəyini gizlətməsi ilə bağlı ilk hal deyil. Bələdiyyə “Ən yaxşı təcrübə” proqramı üzrə iki mükafat alıb və bu barədə öz “Facebook” səhifəsində məlumat paylaşıb. Amma həmin məlumatda da Aİ-nin dəstəyi və vətəndaş cəmiyyətinin rolu qeyd olunmayıb.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---