Müxalif “Qaxariya Gürcüstan naminə” partiyasının lideri Qiorqi Qaxaria – bir zamanlar “Gürcü Arzusu”

hökumətində baş nazir, həmçinin, iqtisadiyyat və daxili işlər naziri olmuş siyasətçi – yenidən Parlamentdə mübahisəli şəkildə yaradılmış müvəqqəti istintaq komissiyasının iclasına çağırılıb. Bu barədə məlumat 16 iyun tarixində yayılıb.

Komissiyaya “Gürcü Arzusu”nun lideri və Qaxariyanın baş nazirliyi dövründə baş nazirin müavini olmuş Tea Tsulukiani rəhbərlik edir.

“Böyük ümid edirəm ki, cənab Qiorqi əlavə ifadə üçün gələcək. Bu, bizə Çorçana, Tsaqveri və digər kəndlər haqqında müzakirəni davam etdirməyə imkan verəcək – o kəndlər ki, cənab Qaxarianın dediyinə görə, onun postun qurulması ilə bağlı atdığı addım nəticəsində Gürcüstanın mərkəzi hakimiyyəti bir santimetr də olsun ərazi itirməyib və həmin sahələr işğal olunmayıb”, – deyə Tea Tsulukiani komissiyanın iclasında bildirib.

Onun sözlərinə görə, Qiorqi Qaxariyaya 23 iyun tarixində müxalifətdə olduğu dövrdə “beynəlxalq arenadakı fəaliyyəti” barədə də suallar veriləcək.

“Gürcü Arzusu” partiyası bu il, 5 fevral tarixində “Vahid Milli Hərəkat”ın hakimiyyəti dövrünü araşdırmaq məqsədilə istintaq komissiyası yaradıb. Partiyanın məqsədi “Kollektiv Milli Hərəkatın” fəaliyyətini qadağan etməkdir. Bu anlayışa partiya 2024-cü il Parlament seçkilərində 5%-lik baryeri aşmış və hazırkı hökumətin legitimliyini tanımayan böyük müxalif partiyaları daxil edir.

Komissiyanın iclaslarına qatılmadıqlarına görə, Tbilisi Şəhər Məhkəməsi Prokurorluğun təqdimatı əsasında bir neçə müxalif siyasətçini həbs edib. Həbs olunanlar arasında İrakli Okruaşvili, Zura Caparidze, Nika Melia və Nika Qvaramia da var.

Qiorqi Qaxaria komissiyanın iclasında iştirak edən azsaylı müxalifətçilərdən biridir. Ona müxalifətə keçid səbəbləri və Gürcüstanın nəzarətində olan Çorçana kəndində postun açılması ilə bağlı suallar verilib.

Komissiya bir neçə gün əvvəl Çorçana postu məsələsinə yenidən qayıdıb. 11 iyun tarixində keçirilmiş iclasa çağırılan Elquca Xarazişvili komissiyanın rəhbəri Tea Tsulukiani tərəfindən dəfələrlə Çorçana sakini kimi təqdim olunub. Lakin sonradan məlum olub ki, o, əslində Tsaqveri kəndindəndir.

Elquca Xarazişvilinin ifadəsinə görə, Çorçanada post qurulduqdan sonra yerli sakinlər artıq Tsaqveri meşəsinə daxil ola bilmirlər, çünki işğalçı rejim daha da irəliləyərək öz postunu da qurub və meşənin yarısını zəbt edib.

Xarazişvili, postun qurulmasından əvvəl Çorçana kəndinin hansı problemlərlə üzləşdiyi və yerli əhalinin hazırda bu məsələ ilə bağlı nə düşündüyü barədə heç bir fikir bildirməyib.

14 iyun tarixində isə bu məsələ ilə bağlı Gürcüstanın Prokurorluğunda ifadə verənlər arasında Qiorqi Qaxarianın hökumətində daxili işlər naziri olmuş və ondan əvvəl Dövlət Təhlükəsizlik Xidmətinə rəhbərlik etmiş Vaxtanq Qomelauri də olub. Onun sözlərinə görə, “postun qurulması barədə heç bir razılaşma olmayıb və biz bu barədə sonradan xəbər tutmuşuq”.

Vaxtanq Qomelaurinin ifadəsi başa çatdıqdan sonra Gürcüstan Prokurorluğu bəyanat yayıb. Bəyanatda qeyd olunur ki, hazırda aşağıdakı maddələrlə istintaq aparılır:

– Sabotaj (CM 318.1),
– Ağırlaşdırıcı hallarda sabotaja cəhd (CM 19, 318.2),
– Xarici və ya xarici nəzarətdə olan təşkilata düşmən fəaliyyətində yardım (CM 319),
– Gürcüstanın Konstitusiya quruluşu və milli təhlükəsizliyinə qarşı yönəlmiş fəaliyyətin maliyyələşdirilməsi (CM 321¹.2.a).

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---