Gürcüstanın keçmiş baş naziri və keçmiş daxili işlər naziri Qiorqi Qaxarianın 2019-cu ildə Çorçana kəndində sərhədə yaxın ərazidə post yerləşdirməsi ilə bağlı məsuliyyətə cəlb olunması ehtimalı istisna edilmir. Prokurorluq bu məsələni ölkəyə qarşı yönəlmiş mümkün sabotaj və digər cinayət halları çərçivəsində araşdırır.

Çorçana – Şida Kartli bölgəsinin Xaşuri bələdiyyəsində yerləşən kənddir. O, Rusiya tərəfindən işğal olunmuş ərazilərlə – Abxaziya və Tsxinvali bölgəsi ilə sərhədə yaxın yerləşir. Gürcüstan hakimiyyətinin məlumatına görə, həmin ərazi dövlətin nəzarətində idi, lakin 2019-cu ildə rusiyapərəst separatçı qüvvələr sərhəd xəttini birtərəfli qaydada dəyişməyə və yerli sakinləri qanunsuz şəkildə əsir götürməyə başladılar.

Qaxarianın sözlərinə görə, Dövlət Təhlükəsizliyi Xidmətindən əldə olunan operativ məlumata əsasən, separatçılar 1922-ci ilə aid olduğu iddia edilən saxta bir xəritəyə əsaslanaraq Gürcüstanın 28 fərqli nöqtəsində işğal xəttini irəlilətməyə hazırlaşırdılar. Onlar bu prosesi məhz Çorçana istiqamətindən başlamaq istəyirdilər. Gürcüstan tərəfi qabaqlayıcı addım ataraq, ərazidə patrul yolu çəkdi və post yerləşdirdi.

Hakim “Gürcü Arzusu” partiyasının nümayəndələri, o cümlədən Tea Tsulukiani və Aleko Tabatadze bildirirlər ki, bu qərar nə Dövlət Təhlükəsizliyi Xidməti, nə də baş nazir ilə razılaşdırılmışdı. Onların fikrincə, bu addımın nəticəsi olaraq, qarşı tərəf beş yeni post qurdu və işğal xətti müəyyən qədər irəli çəkildi.

Qaxaria isə bildirir ki, qərar bütün müvafiq dövlət qurumları ilə razılaşdırılmışdı və əsas məqsəd – 1800 hektara yaxın meşə sahəsinin itirilməsinin qarşısının alınması – yerinə yetirildi. Onun sözlərinə görə, heç bir müharibə təhlükəsi olmayıb və bu gün xəritədə və real vəziyyətdə sərhəd əvvəlki yerindədir.

Prokurorluq qeyd edir ki, istintaq təkcə Çorçana hadisəsini deyil, həm də mümkün sabotaj, xarici dövlətlərə qarşı düşmənçilik fəaliyyətlərinə yardım və Gürcüstanın Konstitusiya quruluşuna qarşı yönəlmiş maliyyə dəstəyi ilə bağlı digər halları da araşdırır.