Qiorqi Qaxariyanın rəhbərlik etdiyi “Gürcüstan üçün” partiyası bildirir ki, Tsulukianın komissiyası keçmiş baş nazirin uzaqdan – onlayn ifadə verməsi barədə müraciəti rədd edib.

Eyni zamanda, bu gün komissiyada Gürcüstanın BMT-dəki səfiri David Bakradze onlayn şəkildə dindirilib. Qeyd edək ki, komissiya daha əvvəl də məhbuslar da daxil olmaqla, bir neçə şəxsi onlayn qoşularaq ifadə verməyə dəvət etmişdi.

Partiyanın məlumatına görə, Qiorqi Qaxariyanın hazırda ölkədən kənarda – əvvəlcədən planlaşdırılmış səfərdə olduğunu nəzərə alaraq, o, iclasa onlayn rejimdə qatılmağa hazır olduğunu yazılı şəkildə komissiyaya iki dəfə bildirib. Həm də partiya xatırladır ki, aprel ayında – birinci çağırış zamanı – uzaqdan ifadə vermək təklifi məhz komissiyanın öz tərəfindən səsləndirilmişdi. Buna baxmayaraq, 22 iyun tarixində komissiyadan rəsmi bildiriş gəlib ki, Qaxariyanın onlayn ifadəsi qəbul olunmur və onun iyunun 23-də – bazar ertəsi günü saat 12:00-da Tbilisidə şəxsən iştirakı tələb olunur. Partiyanın fikrincə, bu tələb heç bir obyektiv səbəblə əsaslandırılmır, əgər komissiyanın həqiqətən Çorçana məsələsi ilə marağı varsa, uzaqdan ifadəyə mane olmamalıdır.


Qaxariyanın komandası bildirir ki, eks-baş nazir hələ də komissiyaya uzaqdan danışmağa hazırdır və bu, Gürcüstana qayıdana qədər keçərli olacaq.

“Gürcüstan üçün” partiyasının “Netgazetə”yə təqdim etdiyi rəsmi məktubda, komissiyanın sədri Tea Tsulukiani Qiorqi Qaxariyaya yazır:

“Bildiririk ki, komissiya sizin 2025-ci il iyunun 23-də, saat 12:00-da Tbilisidə fiziki olaraq komissiyaya gəlməyinizi tələb edir. Bu barədə sizə şəxsən 2025-ci il iyunun 16-da məlumat verilmişdir.”

Komissiyanın üzvü Tengiz Şarmanaşvilinin sözlərinə görə, Qaxariya hər nə qədər təqsirləndirilən şəxs olmasa da, onun xüsusi statusu var və bu status onun mütləq şəkildə fiziki şəkildə ifadə verməsini tələb edir:

“Onlayn ifadə verənlər ya hadisənin şahidi olub, ya da zərərçəkmiş şəxs. Qaxariya isə Çorçana ilə bağlı hadisələrə görə məsuliyyət daşıyır, ona görə də o, başqa statusdadır. Onun təqsirləndirilən olub-olmadığını prokurorluq müəyyənləşdirəcək, amma o nə şahiddir, nə də zərərçəkən. Bu səbəbdən, ona əvvəlcədən komissiyaya gələcəyi bildirildiyindən, gəlməli idi. Komissiya hansı qərarı verəcək – bunu birlikdə görəcəyik,” – deyə Şarmanaşvili bildirib.

Qiorqi Qaxariya artıq ikinci dəfə komissiyaya çağırılıb.

Qeyd edək ki, Çorçana sərhəd-keçid məntəqəsi ilə bağlı komissiya Qaxariyaya ilk dəfə 14 aprel tarixində suallar ünvanlamışdı. Komissiyanın sədri Tea Tsulukiani bildirir ki, Qaxariya daxili işlər naziri olduğu dövrdə, hökumətin və təhlükəsizlik xidmətinin razılığı olmadan Çorçanada nəzarət-buraxılış məntəqəsi açıb, bu isə bölgədə vəziyyətin gərginləşməsinə səbəb olub.

• Sonradan məlum olub ki, Çorçana ilə bağlı məsələ üzrə Gürcüstan Prokurorluğunda araşdırma aparılır. İstintaq bu maddələr üzrə gedir:
• Diversiya;
• Ağırlaşdırıcı hallarda diversiya cəhdi;
• Xarici təşkilatlara və ya onların nəzarətində olan qurumlara düşmənçilik fəaliyyətində yardım;
• Gürcüstanın konstitusiya quruluşuna və milli təhlükəsizliyinə qarşı fəaliyyətə maliyyə dəstəyi göstərmək.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---