“Gürcü Arzusu” hökumətinin baş naziri İrakli Kobaxidze siyasətçi Zurab Çaparidzenin mübahisəli parlamentdə yaradılmış müvəqqəti istintaq komissiyasına gəlmədiyinə görə 7 aylıq həbs cəzasına məhkum olunmasına münasibət bildirib.

Kobaxidzenin sözlərinə görə, bu vəziyyətə Çaparidzeni “dərin dövlət” (“deep state”) gətirib:

“Çaparidze ilə bağlı – əgər bir insan qanunu, cinayət qanunvericiliyini pozursa, təbii ki, buna reaksiya olacaq. Burada söhbət Tea Tsulukianidən yox, parlamentin istintaq komissiyasının sədrindən gedir. İstintaq komissiyasının və onun sədrinin sualları varsa, hər kəs ölkənin Konstitusiyasına hörmət göstərməyə borcludur. Kim bu öhdəliyi yerinə yetirmirsə – həbsxanaya gedəcək. Bu vəziyyətə bu adamları “deep state” gətirdi. Onlar öz agentlərinin taleyi ilə maraqlanmırlar – agent həbsdə olacaq, yoxsa azadlıqda, siyasi taleyi necə olacaq – veclərinə deyil. Əgər sən ‘deep state’in agentsənsə, bilməlisən ki, lazım gəlsə, səni qanun və Konstitusiya pozuntusuna məcbur edəcəklər və bu səbəbdən həbsə düşə bilərsən – bu, ‘deep state’ agentlərinin taleyidir,” – deyə Kobaxidze bildirib.

O, bu sözləri Tbilisi meriyası tərəfindən təşkil olunmuş tədbirdən sonra jurnalistlərin sualına cavab olaraq deyib.

“Gürcü Arzusu” son illərdə “qlobal müharibə partiyası” adlandırdığı, daha sonra isə “deep state” kimi təqdim etdiyi struktura dair konspirasiya nəzəriyyəsi əsasında fəaliyyət göstərir. Hakim partiya bu quruma Gürcüstanın beşinci prezidenti Salome Zurabişvilini, müxalif siyasətçiləri, vətəndaş cəmiyyətinin bəzi nümayəndələrini, eləcə də Avropa Parlamentini və “Gürcü Arzusu”nun avtoritar idarəçiliyini və xarici siyasət kursundakı dəyişiklikləri tənqid edən istənilən siyasətçini və dövləti aid edir.

“Gürcü Arzusu” iddia edir ki, Brüsseldən Gürcüstan hakimiyyətinə qarşı çıxan qüvvə “deep state”dir və onun məqsədi Gürcüstanı müharibəyə sürükləməkdir. Lakin bu qurumun mövcudluğu və planları heç bir faktla təsdiqlənməyib. Buna baxmayaraq, hakim partiya bildirir ki, Gürcüstan avrointeqrasiya kursundan dönməyib və Avropa İttifaqının “ikili standartlarından” və “ədalətsiz yanaşmasından” danışır.

Müxalif koalisiya “Dəyişiklik uğrunda”nın nümayəndəsi Zurab Çaparidze parlamentdə yaradılmış müvəqqəti istintaq komissiyasına gəlmədiyinə görə, Tbilisi Şəhər Məhkəməsinin hakimi Jvebe Naçkebia tərəfindən 7 ay müddətinə azadlıqdan məhrum edilib. Hökm bu gün, 23 iyun tarixində elan olunub.

Əlavə olaraq, Zurab Çaparidzenin növbəti iki il ərzində dövlət qulluğunda vəzifə tutması qadağan olunub.

Siyasətçi 22 may tarixində saxlanılıb. 7 aylıq cəza müddəti 2025-ci il dekabrın 22-də başa çatır – bu vaxtadək artıq Gürcüstanda bələdiyyə seçkiləri keçirilmiş olacaq.

Nə hökmün elanına, nə də əvvəlki məhkəmə iclaslarına Zurab Çaparidze qatılmayıb. Hökm 150 nəfərlik zalda oxunub, lakin iştirakçılar sırasında yalnız prokuror, vəkil və media nümayəndələri olub.

Çaparidze 22 mayda hakim İrakli Şvangiradzenin qərarı ilə məhkəmə zalında həbs olunub. Onun ödəmədiyi 20 000 lari girov cəza ilə əvəz olunub və bu, prokurorluğun tələbini tam təmin edib.

Həmin gün məhkəmə binasında və ətrafında təhlükəsizlik tədbirləri gücləndirilib – bir çox vətəndaş binaya buraxılmayıb, media kameralar isə məhkəmə foyesinə salınmayıb. Bu, əvvəl məhkəmə praktikasında görünməmişdi. Məhkəmənin ictimaiyyətlə əlaqələr xidməti bunu xüsusi istisna halı kimi izah edib.

Zurab Çaparidzeyə qarşı iş Gürcüstan Cinayət Məcəlləsinin 349-cu maddəsi ilə qaldırılıb. Bu maddə parlamentin müvəqqəti istintaq komissiyasının tələbini yerinə yetirməməyə görə məsuliyyət nəzərdə tutur.

Hakim “Gürcü Arzusu” partiyası keçmiş “Vahid Milli Hərəkat” hakimiyyətinin dövrünü araşdırmaq üçün istintaq komissiyasını 5 fevralda yaradıb. Komissiyaya həmin partiyanın liderlərindən biri – Tea Tsulukiani rəhbərlik edir.

“Gürcü Arzusu” “Milli Hərəkat”ı qadağan etmək istəyir – bu ifadə ilə onlar 2024-cü il parlament seçkilərində baryeri keçmiş, lakin hazırkı hakimiyyətin legitimliyini tanımayan əsas müxalif partiyaları nəzərdə tutur.

Tea Tsulukianinin rəhbərlik etdiyi komissiyaya gəlmədiyinə və müəyyən edilmiş girovu ödəmədiyinə görə dörd siyasətçi həbs olunub: Zurab Çaparidze, İrakli Okruaşvili, Nika Melia və Nika Qvaramia.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---