"Lelo – Güclü Gürcüstan" partiyasının baş katibi İrakli Kupradzenin verdiyi məlumata görə, partiyanın bank hesabları dondurulub.

"Antikorrupsiya Agentliyi ilə yanaşı, artıq bizə Gürcüstanın Ədliyyə Nazirliyi və İcra üzrə Milli Bürosu da hücum edir. Bu gün İcra üzrə Milli Bürodan məktub aldıq. Orada bildirilir ki, 'Lelo – Güclü Gürcüstan' koalisiyasının rəsmi bank hesabı dondurulub. Bu, bizim Gürcüstan

vətəndaşları ilə birlikdə apardığımız mübarizəyə və İvanişvilinin zorakı, Rusiya yönümlü rejiminə qarşı göstərdiyimiz müqavimətə mane olmaq üçün atılan daha bir aciz cəhddir. Hesabların dondurulmasından və ya koalisiya liderimizə və onun ailəsinə qarşı təbliğat aparılmasından asılı olmayaraq, biz bunları ciddi qəbul etmirik. Çünki bu, 'Gürcü Arzusu' partiyasının çarəsizliyinin göstəricisidir. Onlar zəifliklərindən qorxurlar və bilirlər ki, biz onları bu mübarizədə məğlub edə bilərik. Ona görə də belə gülünc mexanizmlər uydururlar", – deyə Kupradze bildirib.

Bundan əvvəl Vergilər Xidməti və Antikorrupsiya Bürosu bəyan etmişdi ki, Mamuka Xazaradzeyə məxsus ailə mülkiyyətində olan daşınmaz əmlakın Almaniyanın səfiri Peter Fisherə icarəyə verilməsi ilə bağlı “mümkün vergi qanun pozuntusu”, Xazaradzenin bəyanatı və partiyanın ianələri araşdırılır.

Nə baş verir?

Son bir neçə gündə hökumətyönlü mediada Almaniyanın səfiri Peter Fisherin Mamuka Xazaradzeyə məxsus (əslində onun həyat yoldaşına) olan mənzildə yaşadığı və tərəflər arasında icarə müqaviləsinin tapılmadığı barədə məlumat yayılırdı. Bu təbliğat xarakterli xəbərlərlə bağlı "Gürcü Arzusu" partiyasının nümayəndələri bildirirdilər ki, bütün qaydalar və normalar pozulub.

"Əgər səfir icarə müqaviləsi bağlamırsa və xüsusilə də ev sahibi siyasi partiya lideridirsə, səfir də onun mövqeyini dəstəkləyirsə, bu hal siyasi korrupsiya hesab oluna bilər", – deyə "Gürcü Arzusu" partiyasının üzvü Gia Volski bildirib.

Vergilər Xidməti də açıqlama yayaraq bildirib ki, "məsələnin təhlili zamanı" mümkün vergi qanun pozuntusu müəyyən edilib.

"Yüksək ictimai marağı nəzərə alaraq, bildiririk ki, Mamuka Xazaradzeyə və onun ailəsinə məxsus daşınmaz əmlakın Almaniyanın Gürcüstandakı səfiri Ernst Peter Fisherə icarəyə verilməsi zamanı vergi öhdəliyindən yayınma halları ola bilər.

İctimaiyyətə yayılan məlumatların araşdırılması nəticəsində bu məsələdə mümkün vergi pozuntusu müəyyən edilmişdir. Buna görə də Vergilər Xidməti artıq faktların araşdırılmasına başlayıb və məsələnin tam öyrənilməsi üçün qanunla nəzərdə tutulmuş vergi nəzarəti tədbirləri həyata keçirilir", – deyə açıqlamada bildirilir.

Mamuka Xazaradzenin bəyanatına görə, həyat yoldaşının adına olan daşınmaz əmlakın Almaniya səfiri ilə icarə müqaviləsi qanunun bütün tələblərinə uyğun şəkildə tərtib olunub və qeydiyyatdan keçib. Lakin onların özünün də qeyd etdiyi kimi, “ötən həftə büdcəyə vergi ilə bağlı məsələ aşkar olunub ki, bu da mənbədə vergiyə cəlb olunma və olunmama məsələsindəki anlaşılmazlıqdan qaynaqlanıb”.

"Bizim müraciətimiz əsasında Vergilər Xidmətində müvafiq qeydiyyat aparılıb və büdcəyə ödəniş tam şəkildə həyata keçirilib. Beləliklə də məsələ tam bağlanıb", – deyə Xazaradze bildirib.

Antikorrupsiya Bürosu həmçinin Xazaradzenin bəyanatını və partiyaya edilən ianələri də araşdırdıqlarını bəyan edib.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---