Cənubi Qafqazda strateji vakuum yaranır və Avropa antidemokratik qüvvələrin bu regionda nüfuzunu möhkəmləndirməsinə mane olmalıdır. Alman Marşall Fondundan Elene Kintsuraşvili Rusiyanın regiondakı hegemon rolunun zəiflədiyini, Kremlə etibarın azaldığını yazır.

Müəllifin fikrincə, Ermənistanla Azərbaycan Moskvanın təsirindən uzaqlaşır, Gürcüstan isə Rusiyanın hibrid təsiri altında avtoritarizmə sürüklənir. Onilliklərdən bəri ilk dəfədir ki, Qərb dövlətlərinə regionda təhlükəsizliyə yön verməyə real imkan yaranır.

"Amma Moskva, Çin və İran bu boşluğa yenilənmiş rəqabətlə daxil olur. Avropanın indi necə hərəkət edəcəyi regionun sabitlik zonasına, yoxsa təsir uğrunda yeni döyüş meydanına çevriləcəyini müəyyən edəcək", – məqalədə deyilir.

Rusiyanın hibrid təsir alətləri
Müəllif Rusiyanın regiondakı hibrid təsir alətlərindən – hərbi iştirakından, konfliktləri manipulyasiya etməsindən, iqtisadi və mədəni təsirindən söz açır. Moskva 2022-ci ildə Ukraynada təcavüzkar müharibəyə başlayandan sonra ənənəvi rıçaqlar gücdən düşməyə başlayıb. Regional oyunçular da seçimlərini yenidən nəzərdən keçirməyə başlayıblar. Rusiyaya inamı azalan Yerevan ABŞ və Aİ-yə meyllənir. Bakının Moskva ilə əlaqələri kəskin pisləşib. Tbilisidə isə Moskva hibrid taktikayla nüfuz dairəsini möhkəmləndirir, Gürcüstanın belaruslaşması gedir, - müəllif yazır.

Məqalədə deyilir ki, güc boşluğu Çin kimi qeyri-demokratik gücləri də cəlb edir və Avropa İttifaqı qətiyyətlə hərəkətə keçməlidir. Məsələn, blok Azərbaycanı Ermənistandan keçməklə Naxçıvan eksklavı ilə birləşdirəcək TRIPP marşrutundan yararlanaraq sərmayəni və ticarəti sabitlik hədəfləri ilə uzlaşdıra bilər.

Xatırlatma

• Avqustun 8-də Azərbaycan, Ermənistan və ABŞ liderlərinin Vaşinqtonda imzaladığı bəyannamədə bölgədən TRIPP - "Tramp yolu"nun çəkilməsi nəzərdə tutulub. Bu marşrutun Ermənistanın suverenliyini, ərazi bütövlüyünü və yurisdiksiyasını qoruyub saxlayacağı bildirilir. "Tramp yolu" Azərbaycanın "Zəngəzur dəhlizi" dediyi marşrutdur. Yerevan "dəhliz" termini qəbul etmir.
• Avropa İttifaqının Cənubi Qafqaz və Gürcüstanda böhran üzrə xüsusi təmsilçisi Maqdalena Qrono sentyabrın əvvəlində Azərbaycan və Ermənistanda olub, Vaşinqton bəyannaməsini müzakirə ediblər. Aİ təmsilçisi qurumun nəqliyyat dəhlizinin gerçəkləşdirilməsinə dəstək verməyə hazır olduğunu deyib.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---