Mixeil Kavelaşvili 5 oktyabrda keçirdiyi brifinqdə bildirib ki, 4 oktyabrda Tbilisidə Prezident Administrasiyası önündə baş verən hadisələr “xarici xüsusi xidmət orqanlarının tapşırığı ilə idarə olunurdu”.

Onun sözlərinə görə, artıq təşkilatçılar, o cümlədən opera müğənnisi Paata Burçuladze saxlanılıb.

Əsasən “Gürcü Arzusu”nun nümayəndələrindən ibarət seçki kollegiyası tərəfindən seçilmiş prezident dövlət institutlarını çağırıb ki, xalqı devirməyə və zorakılığa çağıranlara qarşı xüsusi sərtlik göstərsinlər.

“Gürcüstanda hələ də xarici xüsusi xidmətlərin tapşırığı ilə hərəkət edən qüvvələr mövcuddur və buna cəmiyyətimiz şahidlik etdi – onların necə davrandığını hamı gördü. Onlar ətrafdakı hasarı dağıtdılar, şəhərimizin görməli yerlərindən birinə zərər vuruldu. Hər gün çoxlu vətəndaş və turist buradan istifadə edir, amma dünən hamı bunun necə dağıdıldığını gördü və bu, heç kimə bağışlanmamalıdır. Xarici xüsusi xidmətlərin təşkil etdiyi bu qüvvələr dünən Gürcüstan vətəndaşlarını hakimiyyətin devrilməsinə çağırırdılar və bu, onlara bağışlanmayacaq, sərt cavab veriləcək” – deyə Kavelaşvili bəyan edib. Onun sözlərinə görə, hüquq-mühafizə orqanları yüksək standartlarla hərəkət ediblər.

Kavelaşvili bildirib ki, etirazçılar Prezident Administrasiyasının həyətinə girəndə o, binanı tərk etməyib. Prezidentin harada olması barədə suala isə cavab verib ki, bu, təhlükəsizlik baxımından açıqlanmamalıdır.

O, həmçinin deyib ki, “Qızılgül inqilabı” da xarici qüvvələr tərəfindən idarə olunmuşdu və heç də sülh yolu ilə baş verməmişdi:

“Heç bir sülh inqilabı deyildi [‘Qızılgül inqilabı’]. O vaxt dəyişikliklər xarici sifarişlə edildi və təəssüf ki, ölkə agentura və kənardan idarə olunan hakimiyyəti qəbul etdi. İndi də oxşarını təkrarlamağa çalışdılar və son illərdir bu cəhdləri davam etdirirlər. Sadəcə biz hazırıq, cəmiyyət isə bu məsələlərdə artıq təcrübəlidir” – deyə Kavelaşvili bildirib.

5 oktyabrda keçirilən brifinqdə “Gürcü Arzusu”nun baş naziri İrakli Kobaxidze isə bəyan edib ki, “anti-dövlət siyasi qüvvə” – “kollektiv Milli Hərəkat” tamamilə neytrallaşdırılacaq.

“Gürcü Arzusu”nun nümayəndələri dəfələrlə izah ediblər ki, “kollektiv Milli Hərəkat” dedikdə yalnız “Vahid Milli Hərəkat”ı deyil, həm də digər müxalif partiyaları – “Dəyişikliklər Koalisiyası”, “Lelo – Güclü Gürcüstan üçün” və “Gürcüstan üçün Qaxaria” partiyalarını nəzərdə tuturlar.

Kobaxidze əlavə edib ki, onlar “bütün xarici agentləri” və “ekstremist qrupları” da nəzərdə tuturlar. Onun sözlərinə görə, son bir ildə küçələrin 50, 100, 150 nəfərlik qruplar tərəfindən bağlanması da məhz bu ekstremist qrupların iştirakı ilə baş verib.

“Əlbəttə, bu, yanlışdır – 110 nəfərin tərəfindən 1 milyon 100 min nəfərin küçəsinin bağlanması yolverilməzdir” – deyə Kobaxidze bildirib. Onun sözlərinə görə, “ekstremist qrupların” məqsədi “dövlətə, ölkəyə və iqtisadiyyata zərər vurmaq” idi.

Xatırladaq:
• 4 oktyabrda, yerli seçkilərlə paralel, “Rustaveli prospekti” hərəkatı “Xalq Məclisi” adlı kütləvi tədbir planlaşdırmışdı. Məqsəd “sülh inqilabı”, “hakimiyyətin sülh yolu ilə devrilməsi” idi.
• Vətəndaşlar Azadlıq Meydanında toplaşmış, daha sonra təşkilatçılardan Murtaz Zodelavanın çağırışından sonra bir hissə Prezident Administrasiyasına tərəf hərəkət etmiş və bir neçə nəfər həyətin baryerini dağıtmışdı.
• DİN həmin gün “Rustaveli prospekti”nin liderləri Paata Burçuladze və Murtaz Zodelavanı, həmçinin “Milli Hərəkat”ın üzvü İrakli Nadiradzeni, “Strategiya Aqmaşenebeli”nin liderlərindən Paata Mancqaladzeni və polkovnik Laşa Beridzeni saxlamışdı.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.