ABŞ BMT-də Qəzzada iki illik keçid idarəetmə orqanı və beynəlxalq sabitləşdirmə qüvvəsini təsdiqləyən qətnamə layihəsi hazırlayıb. "Reuters" bunu gördüyü sənədə istinadla yazır.


Diplomatlar layihənin hələ hazırlanma mərhələsində olduğunu, dəyişə biləcəyini deyiblər. Bu həftə layihəni bəzi ölkələrlə paylaşıblar. Amma, hələlik, Təhlükəsizlik Şurasının 15 üzvü arasında müzakirəyə çıxarılmayıb. Vaşinqtonun bunu nə vaxt edəcəyi bəlli deyil.

ABŞ Dövlət Departamentinin təmsilçisi deyib ki, prezident Donald Trampın Qəzza planının gerçəkləşdirilməsi ilə bağlı BMT Təhlükəsizlik Şurasının üzvləri, digər tərəfdaşlarla danışıqlar gedir. Amma sızdırıldığı ehtimal edilən sənədlər barədə şərh verməyib.

İki səhifəlik qətnamə layihəsində deyilir ki, "Sülh şurası" adlı keçid idarəetmə administrasiyasına Qəzzada müvəqqəti Beynəlxalq Sabitləşdirmə Qüvvəsi (ISF) yaratmaq səlahiyyəti veriləcək. Bu qüvvənin mandatının icrası üçün bütün zəruri tədbirlərdən, hərbi gücdən istifadə etmək icazəsi olacaq.

ISF mülki əhalini, humanitar əməliyyatları qoruyacaq, İsrail, Misir və "yeni təlim keçmiş və yoxlanılmış Fələstin polisi" ilə birlikdə sərhədlərdə təhlükəsizliyi təmin edəcək. Qüvvə Fələstin polisinə təlim keçəcək, onu dəstəkləyəcək.

ABŞ və Aİ-nin terrorçu saydığı HƏMAS ilə İsrail bir ay öncə Trampın Qəzza üzrə 20 bəndlik planının ilk mərhələsinə razılaşıblar. Bununla iki illik müharibəyə son qoyulub, girov mübadiləsi aparılıb.

Qətnamə layihəsi isə planın növbəti mərhələsini, Sülh Şurası və ISF-in yaradılmasını dəstəkləyir.

Trampın planında HƏMAS-ın Qəzzadakı idarəçiliyinə son qoyulması, qruplaşmanın tərksilahı nəzərdə tutulur. HƏMAS, hələlik, tərksilahla bağlı rəsmi açıqlama verməyib, ancaq daha öncə belə tələbləri rədd edib.

Tramp administrasiyası ABŞ hərbçilərinin Qəzzaya göndərilməsini istisna edib. "Reuters" Vaşinqtonun İndoneziya, Birləşmiş Ərəb Əmirlikləri, Misir, Qətər, Türkiyə və Azərbaycanla çoxmillətli qüvvəyə qoşulmaq barədə danışıqlar apardığını yazır. İsrail dəfələrlə Türkiyə qüvvələrinin yerləşdirilməsinə etiraz edib.

Sənəd həmçinin Dünya Bankı, digər maliyyə qurumlarını Qəzzanın bərpası və inkişafına maliyyə resursları ayırmağa çağırır. Bunun üçün donorların idarə etdiyi xüsusi etimad fondu yaradılması təklif olunur.

Təhlükəsizlik Şurasında qətnamənin qəbul olunması üçün ən azı doqquz səs və ABŞ, Britaniya, Fransa, Rusiya və Çinin veto qoymaması lazımdır.

Layihə barədə məlumatı ilk dəfə "Axios" yayıb.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.