Amerikalı konqresmenlər ABŞ dövlət katibi Marko Rubioya iki partiyalı məktub göndərərək administrasiyanı Gürcüstanda antiamerikan ritorikanın

artması fonunda gürcü rəsmi şəxslərinin ədalətsiz hədəfi olan ABŞ-ın keçmiş əməkdaşını qorumağa çağırırlar — bu barədə ABŞ Senatının Xarici Əlaqələr Komitəsi tərəfindən yayılan mətbuat relizində bildirilir.

 

Söhbət Gürcüstan Dövlət Təhlükəsizlik Xidmətinin rəhbəri Mamuka Mdinaradzenin bəyanatından gedir. O, iddia edib ki, guya Tailanddakı ABŞ səfirliyi “Çin təhlükələrinə” qarşı mübarizə üçün nəzərdə tutulan vəsaitləri Gürcü “radikalların” dəstəklənməsinə xərcləyir.

Məktubda konqresmenlər Marko Rubiodan tələb edirlər ki, Gürcüstan hakimiyyətindən zəmanət alsın — ABŞ-ın Beynəlxalq İnkişaf Agentliyinin (USAID) Xarici Xidmətinin keçmiş əməkdaşları (Foreign Service Nationals, FSNs) və ABŞ tərəfindən işə götürülmüş digər şəxslər böhtan və ya təqiblərin qurbanı olmayacaqlar.

Onlar həmçinin Dövlət Departamentini çağırırlar ki, Gürcüstanın hakim partiyası “Gürcü Arzusu” tərəfindən yayılmış və ABŞ-ın keçmiş əməkdaşlarını təhlükə altına qoyan yalan məlumatlara sərt şəkildə cavab versin.

Məktuba imza atanlar ABŞ senatorları Cin Şahin (Demokrat Partiyası), Senatın Xarici Əlaqələr Komitəsinin üzvü Rocer Uiker (Respublikaçı Partiya), Con Körtis (Respublikaçı Partiya), Şeldon Vaythaus (Demokrat Partiyası) və konqresmenlər Co Uilson (Respublikaçı Partiya) və Stiv Koen (Demokrat Partiyası)dır.

Məktubda qeyd olunur:
“"Gürcü Arzusu"nun rəhbərliyi ilə Gürcüstan hökuməti dəfələrlə ABŞ ilə ikitərəfli münasibətlərin bərpası arzusunu ifadə edib, lakin onların addımları və bəyanatları bunun əksini göstərir. Sizi çağırırıq ki, Gürcüstan hökumətindən zəmanət tələb edəsiniz — USAID-in Xarici Xidmətinin keçmiş əməkdaşları və ABŞ tərəfindən işə götürülmüş digər şəxslər böhtan və ya hücumların hədəfi olmayacaqlar.”

Konqresmenlərin sözlərinə görə, “1 oktyabrda mediada yayılan xəbərlərə əsasən, Gürcüstan Dövlət Təhlükəsizlik Xidmətinin rəhbəri Mamuka Mdinaradzə ABŞ hökumətini inqilabı təşviq etməkdə ittiham edib, guya xarici xidmət əməkdaşlarına maaş ödənişi adı altında vəsait verilib.”

“Əslində bu ödənişlər işdən çıxan əməkdaşlara təqaüd kompensasiyası kimi Gürcüstan qanunvericiliyinə uyğun şəkildə həyata keçirilmişdi. Onun şərhlərini ‘Gürcü Arzusu’nun digər siyasətçiləri də paylaşdılar. Bu yanlış təqdimat xarici xidmət əməkdaşlarını təhlükə altında qoyur. Bu bəyanatlar eyni zamanda göstərir ki, ‘Gürcü Arzusu’ ABŞ ilə münasibətlərin yaxşılaşdırılması istiqamətində ciddi niyyət göstərmir,” – deyə məktubda vurğulanır.

Məktub müəllifləri qeyd edirlər ki, ABŞ hökuməti xarici ölkələrdə fəaliyyət göstərmək üçün yerli işçilərə güvənir və onların vasitəsilə ABŞ siyasətini həyata keçirir.

“Əgər biz bu əməkdaşları xarici hökumətlərin hücumlarından qorumasaq, bu, bizim dünya üzrə siyasətimizi həyata keçirmək və yerli əməkdaşları cəlb etmək imkanlarımızı məhdudlaşdıracaq. Biz sizi bu hücumları qınamağa və Dövlət Departamentinin ABŞ adından çalışan şəxslərin hədəfə alınmasına güclü cavab verməsini təmin etməyə çağırırıq,” – deyə konqresmenlər Marko Rubiyoya yazırlar.

Bundan əvvəl, 9 oktyabrda, Senatın Xarici Əlaqələr Komitəsinin sədri Cim Riş (Respublikaçı Partiya) və komitədə demokratların lideri Cin Şahin birgə bəyanat yayaraq bildirmişdilər ki, “Gürcüstan hökumətinin ABŞ-ın keçmiş əməkdaşlarını əsassız olaraq ittiham etməsi, guya onların Gürcüstan hökumətini zəiflətməyə çalışması, qəbuledilməzdir.”

“Gürcü Arzusu” hökumətinin baş naziri İrakli Kobaxidze 8 oktyabrda keçirdiyi brifinqdə ABŞ Dövlət Departamentini “dərin dövlətin təsiri altında fəaliyyət göstərmədiyini” sübut etməyə çağırıb və bunu “hakimiyyətin devrilməsi cəhdinin pislənməsi” ilə əsaslandırıb. Söhbət 4 oktyabrda Tbilisidə baş verən hadisələrdən gedir — o zaman etirazçılar Prezident Sarayının hasarını aşaraq həyətə daxil olmuşdular.

Kobaxidze bu bəyanatı ABŞ Dövlət Departamentində Gürcüstan səfiri Tamar Taliaşvilinin çağırılmasına cavab olaraq səsləndirib. Dövlət Departamenti “Gürcü Arzusu” nümayəndələrinin “Tailanddan inqilabın maliyyələşdirilməsi” barədə açıqlamaları ilə bağlı “dərin narahatlığını” ifadə edib.

Baş nazir eyni brifinqdə yenidən bildirib ki, ABŞ administrasiyası ilə münasibətləri “yenidən başlamaq” istəyirlər.

Bununla belə, ABŞ 2024-cü ilin noyabrında Gürcüstanla çoxillik strateji tərəfdaşlığı dayandırıb.

Buna səbəb “agentlər haqqında qanun”, “Gürcü Arzusu” rəsmilərinin anti-Qərb ritorikası və saxta ittihamlar əsasında aparılan təbliğat olub. ABŞ dəfələrlə Gürcüstan hökumətini Avropa və Avroatlantik inteqrasiya yoluna qayıtmağa çağırıb.

Strateji tərəfdaşlığın dayandırılması barədə qərar Dövlət Departamenti tərəfindən 2024-cü il 30 noyabrda elan edilib. Bu, hökumətin 28 noyabrda Gürcüstanın Aİ-yə üzvlük danışıqlarını 2028-ci ilə qədər gündəmə gətirməmək qərarından və bu qərara qarşı keçirilən etirazların zorakılıqla dağıdılmasından sonra baş verib.

Vaşinqton “Gürcü Arzusu”nun qurucusu Bidzina İvanişviliyə və hökumətin müxtəlif qollarının nümayəndələrinə sanksiyalar tətbiq edib.

“Gürcü Arzusu” ümid edirdi ki, ABŞ-ın siyasətini prezident Tramp dəyişəcək.

2025-ci il 13 mayda hökumət başçısı İrakli Kobaxidze açıq məktubla ABŞ prezidenti Donald Trampa və vitse-prezident Cey Di Vensə müraciət edib.

28 mayda ABŞ səfirliyi açıqlama yayaraq bildirmişdi ki, “Gürcü Arzusu” partiyasının fəxri sədri Bidzina İvanişvili səfir Robin Daniganla görüşdən imtina edib — həmin görüşdə Tramp administrasiyasının mesajı çatdırılmalı idi.

İvanişvili cavab məktubunda səfirliyin bəyanatını “anlaşılmaz” adlandırıb.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.