Asiya İnkişaf Bankı (AİB) Tbilisi–Rustavi və Tbilisi–Mtsxeta, həmçinin Tbilisi–Lilo və Tbilisi Beynəlxalq Hava Limanı istiqamətlərində yerüstü şəhər qatarı (City Train) sisteminin texniki-iqtisadi əsaslandırmasının hazırlanması məqsədilə beynəlxalq məsləhətçi şirkətin seçilməsi üçün beynəlxalq tender elan edib. Layihə “Yaşamaq üçün əlverişli şəhərlərin investisiya proqramı” (LCIP) çərçivəsində maliyyələşdirilir.

Tender sənədlərinə əsasən, məsləhət xidmətlərinin təxmini dəyəri 393 min ABŞ dolları təşkil edir. Bunun 333 min dolları məsləhətçilərin əməkhaqqına və layihə ilə bağlı digər xərclərə ayrılıb, əlavə 60 min dollar isə ehtiyat vəsait (Provisional Sum) kimi nəzərdə tutulub.

Tender sənədlərinə görə, məsləhətçi Tbilisi və ona bitişik bələdiyyələri birləşdirəcək dəmir yolu sisteminin texniki, iqtisadi, maliyyə, ekoloji və sosial baxımdan məqsədəuyğunluğunu qiymətləndirməlidir. Layihənin konsepsiyası Tbilisinin dayanıqlı şəhər mobilliyi planına əsaslanır və paytaxtın Mtsxeta, Rustavi, Marneuli, Tbilisi Beynəlxalq Hava Limanı və şəhərin şərq rayonları ilə Gürcüstan Dəmir Yolunun mövcud infrastrukturundan istifadə etməklə əlaqələndirilməsini nəzərdə tutur.

Tədqiqat çərçivəsində Rustavi, Mtsxeta, Marneuli, Lilonun şərq hissəsi və Poniçala istiqamətlərində dəmir yolu dəhlizlərinin inkişafı üçün optimal variantlar müəyyən edilməlidir. Əsas diqqət mövcud dəmir yolu şəbəkəsinin istifadəsinə yönəldiləcək, lakin zərurət yaranarsa, yeni hissələrin və ya dolama xətlərin tikintisi də nəzərdən keçirilə bilər.

Tender şərtlərinə əsasən, məsləhətçi 10, 20 və 30 illik dövrlər üçün sərnişin axını proqnozlarını hazırlamalı, avtomobillərdən dəmir yolu nəqliyyatına keçid potensialını qiymətləndirməli, stansiyaların yerləşəcəyi məntəqələri, hərəkət tərkibinə olan tələbləri, depoların yerləşdirilməsini və tarif siyasətinin müxtəlif modellərini müəyyən etməlidir.

Araşdırmaya həmçinin ətraf mühitə təsirin qiymətləndirilməsi, iqlim risklərinin təhlili, sosial təsirin öyrənilməsi, mühəndis həllərinin işlənməsi və layihənin iqtisadi-maliyyə təhlili daxildir. Məsləhətçiyə investisiya və istismar xərclərinin hesablanması, xərc-fayda təhlilinin aparılması, iqtisadi gəlirlilik göstəricisinin (EIRR) müəyyənləşdirilməsi və layihənin maliyyə dayanıqlığının qiymətləndirilməsi tapşırılacaq.

AİB-nin texniki sənədinə əsasən, Tbilisidə ictimai nəqliyyatdan istifadə səviyyəsi 2016–2025-ci illərdə ümumi hərəkətlərin 39%-dən 48%-ə yüksəlib. Bununla yanaşı, qeydiyyata alınmış avtomobillərin sayı 540 mindən 880 minə çatıb ki, bu da tıxacların, hava çirklənməsinin və istixana qazı emissiyalarının artmasına səbəb olub.

Həmçinin, 2016–2026-cı illərdə Tbilisinin əhalisi əhəmiyyətli dərəcədə artaraq 1,37 milyon nəfərə çatıb. Bu, əhalinin 224 min nəfər və ya 20% artması deməkdir. Eyni zamanda, Tbilisiyə yaxın Rustavi və Mtsxeta şəhərlərinin əhalisi də artır ki, bu da Tbilisi–Mtsxeta və Tbilisi–Rustavi avtomobil yollarına əlavə yük yaradır.

Tenderin qalibi olacaq beynəlxalq məsləhətçi şirkət texniki-iqtisadi əsaslandırmanı 8 ay ərzində hazırlamalıdır. Yekun hesabat beynəlxalq maliyyə institutları üçün qəbul edilə bilən investisiya paketi formasında təqdim olunmalı və Tbilisi aqlomerasiyasında yerüstü metro və şəhər qatarı sisteminin mümkün maliyyələşdirilməsi və həyata keçirilməsi üçün əsas rolunu oynamalıdır. Məsləhətçi şirkətlər tenderə təkliflərini 13 iyul tarixinədək təqdim edə bilərlər.

Tbilisi ilə Rustavi arasında yerüstü metro tikintisi ideyası “Gürcü Arzusu” tərəfindən hələ 2018-ci ilin oktyabrında təqdim edilmişdi. Həmin dövrün Baş naziri Mamuka Baxtadze bildirmişdi ki, layihə üzərində Tbilisi meriyası və Gürcüstan Dəmir Yolu işləyəcək. Təqdimata əsasən, ilk mərhələdə Samqori Lilo və hava limanı ilə birləşdirilməli, ikinci mərhələdə isə Rustavinin Tbilisi ilə əlaqələndirilməsi planlaşdırılırdı. Lakin sonradan bu layihənin inkişafı dayandırılmışdı.

Mənbə: BusinessMedia

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.