"Gürcüstanda dini məkanların, ibadət yerlərinin tikintisinə icazənin verilməsi çox çətinliklərlə başa gəlir" - Ramin İgidov
"Gürcüstanda dini məkanların, ibadət yerlərinin
tikintisinə icazənin verilməsi çox çətinliklərlə başa
gəlir" - bu barədə "Marneuli" radiosu ilə söhbəti
zamanı Gürcüstan Müsəlmanları İdarəsinin (GMİ) şeyxi Hacı Ramin
İgidov dedi.
Onun sözlərinə görə, 16 may tarixində Gürcüstan Parlamentində
keçirilən dini məsələlər üzrə işçi qrupunun görüşü zamanı bir sıra
məsələlər: orta məktəblərdə dini dərslərin keçirilməsi, dini
məkanların mülkiyyəti məsələsi və onların geriyə qaytarılması, din
haqda qəbul olunacaq yeni qanun və dini məkanların tikintisinə
icazənin verilməsində yaranan çətinliklər müzakirə olundu.
İgidiov bildirdi ki, bir çox hallarda dini məkanların tikilişi üçün
aidiyyətı orqanlara müraciət olunur, ancaq müsbət cavab
verilmir.
Şeyx onu da bildirdi ki, dini məkanın tikintisi üçün xüsusi
tənzimləyici qanunun olmasına ehtiyac var və bu çox önəmlidir.
Onu da qeyd edək ki, işçi qrupun görüşündə Dini Məsələlər üzrə
Dövlət Agentliyinin sədri Zaza Vaşakmadze, müxtəlif dini icmalar,
QHT və hüquqların qorunması sahəsində fəaliyyət göstərən
təşkilatların nümayəndələri iştirak ediblər.