Gürcüstanda valideyn himayəsindən məhrum olan uşaqlar üçün yeni fond yaradılıb
Bir
neçə xeyirxah insan tərəfindən Gürcüstanda valideyn himayəsindən
məhrum olan uşaqlar üçün fond yaradılıb. Bu fondun əsas məqsədi
atasız olan uşaqlara dəstək olmaqdır.
Onlara maddi yardım göstərilir və ehtiyacları
olan digər ləvazimatlar verilir. Bu haqda məlumatı fondun rəhbəri
Mahir Məmmədov verdi. Onun sözlərinə görə, valideyn himayəsindən
məhrum olan uşaqlara yardım fondu qısa olaraq “Əmin” adlanır. Bu
fond kimsəsiz uşaqlara yardım məqsədi ilə yerli ruhanilər və din
xadimləri tərəfindən yaradılıb. Bu fondda Mahir Məmmədovla birlikdə
4 məsləhətçi də fəaliyyət göstərir.
Fondun yaradılmasına necə qərar verildiyi ilə bağlı sualımıza Mahir
Məmmədov belə cavab verdi.
“Cəmiyyətimizin bir çox çətinlikləri olduğunu nəzərə
alaraq biz də bu çətinliklərdən birinə əl uzadıb yardım etmək
istədik. Elə məhz bu düşüncə ilə yardıma ən çox ehtiyacı olan
kimsəsiz uşaqlara bacardığımız qədər yardım etməyə çalışırıq. Artıq
2019-cu ilin iyun ayından fəaliyyət göstəririk. Ən çox nəzərə
aldığımız uşaqlar ataları rəhmətə gedən kimsəsiz uşaqlardır. Və
çalışacağıq ki, bu uşaqlara 16-17 yaşına kimi yardım etməyə davam
edək”, – deyə o, bildirdi.
“Əmin” fondu 40 dan çox kimsəsiz uşağa ayda 50 lari məbləğində
yardım edir. Mahir Məmmədov deyir ki, bu məbləğ hələ az olsa da,
gələcəkdə büdcə artdığı təqdirdə “Əmin” fondu uşaqlara daha çox
yardım edəcək.
Uşaqların tam ehtiyacları qarşılanmasa da, xeyirxah insanların
dəstəyi ilə kimsəsiz uşaqlara yardım davam etdiriləcək. Gürcüstanın
müxtəlif bölgələrindən – Batumi, Marneuli, Bolnisi, Qaraçöp, Msxeta
və Kaspidən insanlar fondun fəaliyyətindən xəbər tutub kimsəsiz
uşaqlara yardım və dəstək olurlar. Bu fond “Facebook”-da “Yetimlərə yardım fondu” adı ilə
qeydiyyatdan keçib. “Əmin” fondu kimsəsiz uşaqlara yardım edərkən
onların qəlblərinin qırılmaması üçün çox diqqət edirlər.
Mahir Məmmədov deyir ki, “Əmin” fondu dərs ilin başlanğıcında
kimsəsiz uşaqlar üçün yeni çanta və məktəb ləvazimatı ilə birlikdə
geyimlər də alıb. Hətta onlar gələcəkdə bu fonda yardım məqsədi ilə
yeni kampaniya – “Geyinmirsənsə, qoy, ehtiyacın varsa, götür”
kampaniyası ilə uşaqlara əlavə dəstək olmağı düşünürlər.
Onu da qeyd edək ki, yardım olunan kimsəsiz uşaqlar 5-17 yaş
arasındadırlar. Bu uşaqlar sadəcə Marneulidən deyil, Laqodexidən,
Batumidən, Rustavidən və Gürcüstanın bir çox bölgələrindəndirlər.
Bu fond dəstəyi isə cəmiyyətdəki xeyirxah insanların yardımları ilə
həyata keçirilir.
“Əmin” fondunun rəhbəri hər kəsi kimsəsizlərə dəstək olmağa
çağırır. “Yardım sevgsi insanların qəlblərindədir. Ümid edirik ki,
müsəlman icması uşaqların səsini eşidəcək və daima yardım
göstərəcəklər. Biz bu uşaqların adı gələndə, qəlbləri qırılmasın
deyə onlara yetim demirik. Onları incitmədən yardımımızı
əsirgəməyək. Gəlin bu sınıq qəlbli, valideyn himayəsindən məhrum
qalmış kimsəsiz uşaqları unutmayaq”, – Mahir Məmmədov
deyir.
Valideyn himayəsindən məhrum olan uşaqlara yardım etmək və maddi
dəstək olmaq istəyənlər GE38BG0000000161337122
hesab nömrəsinə imkanları daxilində yardım edə bilərlər.
Müəllif: Dürdanə
Xudiyeva