Yaz aylarında Poladauri çayının daşması nəticəsində Bolnisi
rayonunun İncəoğlu (Zemo Bolnisi) kəndində əhalinin istifadə etdiyi
suvarma kanalını sel uçurub.
İndi əhali əkdikləri məhsulları suvara bilmirlər. Kənd sakinlərinin
sözlərinə görə, dəfələrlə problemlə bağlı icra nümayəndəsinə
məlumat veriblər, amma problem hələ də öz həllini tapmayıb.
“Bizim vəziyyət çox pisdir. Suyumuz yoxdur. Başqa kəndə
gedib pulla yer alırıq. Körpümüz yoxdur. Gedib-gəlməyimiz uzaqdır.
Biz sizdən kömək istəyirik. Su bahadır. Pulla su verirlər. Çox pis
vəziyyətdəyik. Dolanışığımız pisdir. Dava-dalaşla az miqdarda su
verirlər, onunla da kimisi sulayır, kimisi sulaya bilmir. İş
yerimiz yoxdur. İş yeri verin ki, gedək işləyək. Elə olur ki,
arxdan su içirik. İçmək suyu gəlmir. Paltara, çimməyə arxdan
işlədirik”, – Minayə Budaqova dedi.
“Bizim arxımız yoxdur, əkinimiz batıb gedir. Arxı gəlib
düzəldən yoxdur. Dəhnəni çay aparıb. İçmək suyumuz yoxdur. Bizə
baxan yoxdur. Deputatımız var, ildə bir dəfə gəlib demir ki, burada
nə əskikdir. Sizə nə lazımdır. Yardım gəlir. Deyirsən bu işi
düzəlt. Baxan yoxdur. Bu gün gəldi, sabah getdi. Gələn yoxdur.
Qalmışıq çöldə. Bizə yiyəlik edən yoxdur. Bizə nə kənd soveti, nə
rayon baxır. Gəl, bərabər gedək, arxa baxaq. Deyəcəksiniz ki, siz
məhsulu nə ilə suvarırsınız. Qalmışıq belə”, – 95
yaşlı İsmayıl Hüseynov dedi.
“Bu kəndin böyük problemləri var. Neçə dəfə demişik ki,
qəbiristanlığın yanını düzəldin. 2-3 ildir, söz verirlər ki,
düzəldəcəyik, amma düzəltmirlər. Bu il də bizə pul ayırıblar,
deyirlər, o pulla düzəldəcəyik. İki dəfə gəldilər, ölçdülər,
biçdilər, hələ də qəbiristanlığın qırağını düzəltməyiblər. Onu nə
vaxt düzəldəcəklər, bizə desinlər. Bundan başqa, su çəkiləsidir.
Bizə 25 min manata suyu çəkmədilər. Köhnə quyudur, ağzını
bağlayıblar. Onun ağzını açmağa, deyirlər, pulumuz çatmır. Asan
yerdədir. Bunu çəksinlər. Camaatın problemi çoxdur. Budur, arx
gəlmir. Traktor lazımdır, vermirlər. Kənd icra nümayəndəsinə
deyirik, deyir, gələcək. Amma gəlmir. Merin özü də burada olub.
Kənd icra nümayəndəsi də burada olub. Deputat da gəlib. Onların
hamısına məlumat vermişik. Yenə də deyirlər, düəldəcəyik, eləcə də
gediblər”, – Rəşid Yaqubov dedi.
“Bizim kəndə yardım etmirlər. Söz verirlər, yerinə
yetirmirlər. Qəbiristanlığın dörd yanı düzəldiləsidir. Arxımız
düzələsidir. Heç kim bizə baxmır, qulaq asmır. Deyirlər traktor
gətirib, düzəldəcəyik. Söz verirlər, yerinə yetirmirlər. İndi biz
kimə gedək, şikayət edək. Müraciət edək. Çataxdan gəlməlidir.
Oradan da suyu alıblar. Özləri üçün hovuz düzəldib, istifadə
edirlər. Biz də susuz qalırıq”, – Süleyman Novruzov
dedi.
58 yaşlı İncəoğlu kənd sakini Rasim Musayev və Əşrəf Yaqubov öz
şəxsi torpaq sahələrində pomidor, xiyar, badımcan, bibər, kartof,
lobya və digər məhsullar əkiblər. Onların sözlərinə görə,
əkib-becərdikləri məhsulların yetişdirilməsi üçün suvarmağa ehtiyac
var. Hal-hazırda kənddə su olmadığına görə, məhsulları susuzluqdan
yanır. Buna görə də məhsuldarlıq aşağı düşür və bazara daha az
məhsul çıxarmalı olurlar. Onlar hər il əkin işləri üçün çox pul
xərcləyib, az gəlir əldə etdiklərini deyirlər.
“Kənd icra nümayəndəmiz qonşu kənddəndir. Ermənidir.
Problemlərmizə baxmır. Problemlərmiz olduğu halda, hara müraciət
edəcəyimizi də bilmirik. Kazretin zəhərli suyu arxımıza tökülür.
Onunla da məhsulmuzu suvara bilmirik. O suyla da məhsulumuzu
suvaranda yanıb, gedir. Biz indi istəyirik ki, arxımızı
düzəltsinlər. Burdan əkin yerlərimizi suvaraq. Biz də buradan
qazanc götürürük. Elə iş yeri də yoxdur ki, gedək işləyək. Pul
qazanaq, ailəmizi saxlayaq. Kimə müraciət edirik, deyir, bilmirəm.
Kimə müraciət edək. Merdən böyük adam yoxdur. Kənd icra
nümayəndəsindən böyük adam yoxdur. Özümüzün xalqdan bir adam yoxdur
ki, şikayət edəsən, gəlib baxa. Heç kim baxmır. Biz də məcbur sizə
müraciət etdik. Gəlib çəkəsiniz ki, İncəoğlu kəndi belə yaşayır.
Pis vəziyyətdədir. İndi gəlib bizə deyirlər ki, arxı gərək özünüz
təmizləyəsiniz. İndi gəlin, çəkiliş aparın, görün, nə
vəziyyətdədir. Əl ilə düzələsidir, yoxsa traktorla. Traktorun
sahibi deyir ki, yüz minlik maşını bura sala bilmərəm. Mən
traktordan pisəm ki, mən düzəltməliyəm? Traktor düzəltməyəndən
sonra insan necə düzəldə bilər?” – Rasim Musayev
dedi.
“Bizim problemimiz odur ki, yerimiz-yurdumuz yanır.
Suyumuz yoxdur. Ekskavator gəlib bir saat işlədi. Gəldilər
apardılar ki, işləmir. Başqa traktor gətirəcəyik – dedilər. İndi də
gətirmirlər. Yerimiz-yurdumuz susuzluqdan yanır. Biz indi bilmirik,
nə edək. Su da yoxdur ki, məhsulumuzu suvaraq. Bundan başqa içmək
suyumuz da yoxdur. Bu da bir yerdən gəlir, sonra o da kəsilir. İki
kəndə gəlir. Birdən kəsirlər, o kəndə verirlər, birdən bu kəndə
verirlər. Qapılarda içməli su yoxdur. Yolda 3 yerdədir. İçməli su
olmayanda da gedib maşınla Xaçın, Çatax kəndlərindən
gətiririk”, – Əşrəf Yaqubov dedi.
Kənd sakinləri onu da bildirdilər ki, onların kəndində tək suvarma
suyu problem deyil. Onların kəndlərinin ərazisindən keçərək
Poladauri çayına tökülən Kazretin çirkli suyu da narahat edir.
Məsələ ilə bağlı kənd icra nümayəndəsi Armen Arturyana müraciət
etdik. O, müsahibəsi zamanı bildirdi ki, onun problemlə bağlı artıq
məlumatı var. Bu gün İncəoğlu kəndinə gedəcək və problemin həll
edilməsi istiqamətində əhali ilə birlikdə işləyəcək.
“Ora bir dəfə traktor apardım. Bizdə traktor yoxdur.
Biz Kazretidən xahiş edirik, onlar verirlər. Biz traktoru apardıq,
bir yerdə işlədi. Daha sonra çaydan kanala su haradan gəlirsə,
traktor ora girmədi. Camaatdan xahiş edirəm, deyirəm ki, gedin
traktora mane olan kol-kosu kəsin. Onlar da getmədilər. Yenə də
onların mühəndisləri baxıblar. Dedilər ki, Armen, siz oranı
düzəltmək üçün nə vaxt traktor göndərəcəksiniz. Bu gün yenə də zəng
etdim. Dedim ki, günortandan sonra mən də gələcəyəm, bərabər gedək,
düzəldək. Kazretidən xahiş edək, sabah traktoru versinlər, gətirək,
düzəldək. Başqa mənim əlimdən heç nə gəlmir. Meriyaya da demişəm.
Meriyanın əlində də traktor yoxdur. Onlar da Kazretiyə zəng
edirlər. Onlardan xahiş edirlər və oradan verirlər. Həmişə də belə
olub”, – Armen Arturyan dedi.
Armen Arturyanın sözlərinə görə, əgər bu gün kənd əhalisi ilə
birlikdə kanalın keçdiyi ərazidəki kol-kosu təmizləyə bilsələr,
növbəti gün Kazretidən texnika göndərəcəklər və məsələ öz həllini
tapacaq.