Tbilisidə 10 müasir və çoxfunksiyalı ticarət mərkəzi fəaliyyət göstərir və onların ümumi icarəyə verilə bilən sahəsi 291 728 kvadratmetr təşkil edir.

Bu barədə “TBC Capital”ın 2024-cü il hesabatında qeyd olunub.

Tədqiqata görə, Batumidə 5 ticarət mərkəzi mövcuddur və onların ümumi icarəyə verilə bilən sahəsi 53 901 kvadratmetrdir. Kutaisidə, Zuqdididə və Telavidə olan ticarət məkanları əsasən ticarət mərkəzləri ilə açıq bazarların birləşməsindən ibarətdir. Zuqdidiyə isə 2023-cü ildə müasir ticarət mərkəzi əlavə olunub.

Hesabata əsasən, 2024-cü ildə Tbilisinin ticarət mərkəzlərində orta icarə haqqı kvadratmetr üçün 24.1 dollar təşkil edib ki, bu da əvvəlki illə müqayisədə 7.4% artım deməkdir. Eyni dövrdə Batumidəki ticarət mərkəzlərində orta icarə haqqı 5% artaraq kvadratmetr üçün 23.1 dollar olub. Küçə ticarət obyektlərinə gəldikdə isə, “TBC Capital”ın araşdırmasına əsasən, 2024-cü ildə Tbilisinin mərkəzi küçələrində yerləşən obyektlərdə orta icarə haqqı ən yüksək olub — kvadratmetr üçün 31 dollar. İkinci yerdə isə Batumi qərarlaşıb — kvadratmetr üçün 25.5 dollar.

Bununla yanaşı, “TBC Capital”a görə, Tbilisidə ən yüksək orta icarə haqqı Rustaveli prospektində (kv.m. – 33.3 $) və Çavçavadze prospektindədir (kv.m. – 33.2 $). Batumidə isə liderlik Gorgiladze küçəsinə məxsusdur — burada orta icarə haqqı kvadratmetr üçün 29.4 dollar təşkil edir.