Marneuli şəhərinin 7 saylı ictimai məktəbində müəllim və direktor arasında baş verən qarşıdurma ilə bağlı məlumat ötən həftə yayıldı. Coğrafiya və vətəndaş təhsili müəllimi Dürdanə Nağıyeva yerli onlayn mediaya verdiyi geniş müsahibədə məktəbin direktoru tərəfindən dinə əsaslanan ayrı-seçkiliyə məruz qaldığını iddia edib.

Direktor məsələ ilə bağlı şərh verməkdən imtina etsə də, onun mövqeyini məktəbin müəllim və şagirdləri səsləndiriblər. Belə ki, 27 may tarixində bir neçə müəllim və şagird Marneuli Təhsil Resurs Mərkəzinə yazılı müraciət edərək Dürdanə Nağıyevanın məktəbdən uzaqlaşdırılmasını tələb ediblər. Onlar müəllimi dərslərdə şagirdlərə din və qızların erkən nikahı ilə bağlı təhrif olunmuş məlumatların ötürülməsində ittiham edirlər.

Valideynlərdən biri Könül İsmayılova “Marneuli” radiosuna verdiyi müsahibədə Dürdanə müəllimdən şikayətçi olduğunu, dərsdə qeyri-etik söhbətlər etdiyini bildirdi.

“Uşaqları qorxudur. Cinlərdən-şeytanlardan danışır. Uşaqlar sanki təzyiq altında qalırlar. Deyir evlənin sizin vaxtınız keçir, oxumaq lazım deyil, ailə qurmalısınız. Biz dinimizə qarşı deyilik. Mədrəsəmiz, məscidlərimiz var dinə görə uşaqlarımızı oraya göndərə bilərik. Məktəbə uşaqları təhsil almağa göndəririk. Müəllimin ixtiyarı var mı ki, dərs saatında uşaqlara din haqqında danışsın? Məncə yoxdur. Mən bir valideyn olaraq övladımı o müəllimin dərsinə buraxmayacağam. Heç kim də məni məcbur edə bilməz. Yalnız bu işə nazirlik baxsın, araşdırılsın”, - Könül İsmayılova dedi.

Günay Cəfərova bu məsələlərdən narahat olduğunu və övladının həmin müəllimin dərsində iştirakına razı olmadığını deyir.

“Eşitdiyimə çox pis oldum. Qızım gəldi dedi ki, “mama 13 yaşında qızlar evlənə bilər mi?”.

Valideynlərin sözlərinə görə, müəllim dərsdə uşaqlara 9-cu sinifi bitirdikdən sonra evlənməli olduqlarını deyir.

Marneuli 7 saylı məktəbinin müəllimlərindən biri olan Rasimə Bədəlova Dürdanə müəllimlə mövzu ilə bağlı dəfələrlə söhbət etdiyini, valideynlərin ondan narazı olduqlarını və bu cür hallara yol verməməli olduğunu izah edib.

“Dürdanə Nağıyeva coğrafiya və vətəndaş təhsili dərsləri keçir. Biz müəllim olaraq uşaqlara erkən yaşda evlənməməyi öyrədirik. Bu əksini edir. Başı açıq uşaqlara başlarını örtməyi məsləhət görür. Uşağı təhqir edəcək söhbətlər aparır. Bunu mənə valideynlər deyib. İstəməzdik ki, bu dərəcəyə gətirib çıxarsın”.

Dürdanə Nağıyeva da öz mövqeyini və fikirlərini bizimlə bölüşdü. O, valideynlərin səsləndirdikləri fikirləri təkzib edərək, həqiqəti əks etdirmədiyini və böhtan olduğunu dilə gətirdi.

“Mən xəbərlərə baxanda stres keçirdim. Mənə böhtan atırlar. Mən uşaqlara müəllimdən əlavə valideyn kimi olmuşam. Özləri də şahiddirlər. Mən hüquq dərsi keçirəm. Mənim sayəmdə uşaqlar hüququ bilirlər. Bu qədər insafsızlıq olmaz. Niyə izin vermirsiniz bir tikə çörək pulumu qazanam?! Mən tək qadınam, anamla yaşayıram. Bir valideyn mənim haqqımda insafsızcasına danışır. Deyir azyaşlı uşaqlarımızı evliliyə təşviq edir. Mən həmişə demişəm ki, ən çox oxumaq qızlara lazımdır. Çünki qadın zəif məxluqdur. Bunun tam tərsini demək olmaz axı”.

Pedaqoq Dürdanə Nağıyeva müsahibəsində yazılı ərizə ilə Təhsil Nazirliyinə müraciət etdiyini qeyd etdi, amma ərizənin cavabı ilə tanış ola bilmədiyini vurğuladı.

“Marneuli” radiosu Təhsil Nazirliyi ilə əlaqə saxladı. Bizə bildirdilər ki, Dürdanə Nağıyeva fevral ayında nazirliyə yazılı ərizə ilə müraciət edib lakin, bizə ərizənin məzmunu haqqında məlumat vermədilər. Nazirlik ərizəyə cavab verib amma verilən ünvanın yanlış qeyd olunması səbəbindən cavab Dürdanə Nağıyevaya çatmayıb. Nazirlik bizimlə söhbəti zamanı bildirdi ki, cavab ünvana çatmadığı halda yenidən müraciət olunmalı və yazılı ərizə göndərilməlidir. 

Valideynlər faktla bağlı Yerli Resurs Mərkəzinin rəhbəri Xanəli Qəhrəmanova yazılı müraciət ediblər. Qəhrəmanov bildirdi ki, müraciət formasında qeyd olunan təfərrüatlarla tanış olunacaq və lazımi tədbirlər görüləcək. Hətta, təhsil nazirliyinə də müraciət olunacağını vurğuladı.

Marneuli resurs mərkəzinin qərar qəbul etməyə və ya istintaq aparmağa legitim hüququ yoxdur. Gürcüstanda məktəblər hüquqi baxımdan müstəqildirlər və məktəblərdə bu cür məsələləri araşdırmaq üçün intizam komissiyası fəaliyyət göstərməlidir. Məhz həmin komissiya bu məsələni nəzərdən keçirməli və qərarı Təhsil Nazirliyindən və yerli resurs mərkəzindən asılı olmayaraq qəbul etməlidir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---