1–8 iyun tarixlərində Gürcüstanın Siqnaxi şəhərində beynəlxalq teatr festivalı keçiriləcək. Bu festivalda "Era" Teatrı da iştirak edəcək. Teatrın bədii rəhbəri Anar Rafiqoğlu deyir ki, bu onların ilk teatr festival təcrübəsidir.

“Festivalla bağlı ilk məlumatı sosial şəbəkələr vasitəsilə əldə etdik. Daha sonra araşdırdığımızda bu festivalın kifayət qədər prestijli olduğunu və hətta Gürcüstan Mədəniyyət Nazirliyi tərəfindən rəsmi şəkildə dəstəkləndiyini öyrəndik. Bu, bizim ilk festival təcrübəmizdir. Teatr təsis olunduqdan bir müddət sonra pandemiya başladı. Ardınca isə müxtəlif çətinliklərlə üzləşdik və bu kimi imkanları dəyərləndirmək mümkün olmadı. Hazırda isə artıq formalaşmış bir komandamız var və işlərimiz nisbətən daha stabildir. Düşünürəm ki, bundan sonra həm ölkə daxilində keçirilən festivallarda, həm də müxtəlif xarici ölkələrdə təşkil olunan beynəlxalq festivallarda iştirak edəcəyik,” – Anar Rafiqoğlu bildirib.

Festivalda Gürcüstanla yanaşı, Türkiyə, Rumıniya və Birləşmiş Ərəb Əmirliklərindən teatr kollektivləri də çıxış edəcək. Yerli və xarici peşəkar teatrların eyni səhnədə olması “Era” üçün həm təcrübə, həm də motivasiya deməkdir. Anar Rafiqoğlu vurğulayır ki, bu fürsət onlara böyük ruh yüksəkliyi verir.

“Ölkəmizin bir çox nüfuzlu teatrları ilə eyni səhnəni paylaşacağıq. Ola bilsin ki, onların arasından seçilərək qalib də olarıq. Bu baxımdan olduqca həyəcanlıyıq və motivasiyamız yüksəkdir.”

“Era” Teatrının nümayəndələri bildirirlər ki, festival yalnız səhnə tamaşaları ilə məhdudlaşmır. Tədbir çərçivəsində tanınmış rejissorlar və teatr professorlarının iştirakı ilə ustad dərsləri də keçiriləcək. Qrup üzvləri bu dərslərdə iştirak etməklə peşəkar biliklərini daha da təkmilləşdirmək niyyətindədirlər.

“Qeyd edim ki, festival yalnız tamaşalardan ibarət deyil. Təşkilatçılar sahənin tanınmış rejissor və professorlarını da ustad dərsləri keçmək üçün dəvət ediblər. Biz də bu dərslərdə iştirak etməklə özümüzü peşəkar cəhətdən daha da inkişaf etdirmək fürsəti əldə edəcəyik.”

Anar Rafiqoğlu əlavə edir ki, təəssüf ki, festivala tam heyətlə qoşulmaq mümkün olmayacaq.

“Təəssüf ki, bu cür festivallara tam heyətlə qatılmaq hər zaman mümkün olmur. Qeyd edim ki, təqdim edəcəyimiz tamaşa iki aktyordan ibarətdir. Mən rejissor kimi iştirak edəcəyəm, əlavə olaraq iki nəfər texniki heyətdən bizimlə birgə gedəcək. Lakin komandamızın digər üzvləri də tamaşa günü bizi dəstəkləmək üçün Siqnaxiyə gələcəklər. Əlbəttə, əsas hədəflərimizdən biri ölkə xaricindəki festivallarda iştirak etməkdir. Bunun üçün daim çalışırıq. Əgər dəvət alsaq, məqsədəuyğun olan hər festivala böyük məmnuniyyətlə qatılmaq istəyirik,” – Rafiqoğlu dedi.

“Era” Teatr festivalda amerikalı dramaturq Edvard Albinin “Zoopark əhvalatı” əsəri əsasında hazırlanmış tamaşa ilə çıxış edəcək. Tamaşanın quruluşçu rejissoru Anar Rafiqoğludur. Səhnədə aktyorlar İdris Elnuroğlu və Elnur Vəlizadə çıxış edəcəklər. Qrupla birlikdə iki nəfər texniki heyət də Siqnaxiyə yollanacaq. Teatr heyətinin digər üzvləri isə tamaşa günü kollektivə dəstək olmaq üçün festivala qatılacaqlar.

“Era” Teatrı gələcəkdə də beynəlxalq festivallarda iştirak etməyi hədəfləyir və bu istiqamətdə fəaliyyətini davam etdirir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---