Ukrayna və Polşa prezidentləri Volodimir Zelenski və Karol Navrotski Ankarada keçirilən NATO sammiti çərçivəsində ikitərəfli görüş keçiriblər.

Bu, Polşa prezidentinin Zelenskini ölkənin ən ali dövlət mükafatı olan Ağ Qartal ordenindən məhrum etmək qərarını açıqlamasından sonra liderlər arasında baş tutan ilk görüş olub. Navrotski bildirmişdi ki, bu addım Ukraynanın xüsusi təyinatlı bölmələrindən birinə daha əvvəl UPA qəhrəmanları (“Ukrayna Üsyançı Ordusu” – red.) adının verilməsi qərarına reaksiyadır.

Zelenski görüşü “vacib və zəruri” adlandırıb və bildirib ki, Navrotski ilə bir saatdan çox söhbət edib.

“Bizim ortaq təhlükəmiz var – Rusiya. Qarşılıqlı anlaşmanın, dəstəyin qorunması və birlikdə hərəkət etməyimiz son dərəcə vacibdir”, – deyə Ukrayna prezidenti vurğulayıb və əlavə edib ki, hər iki lider dialoqu davam etdirmək barədə razılığa gəlib.

Navrotski də görüşlə bağlı açıqlama verərək bildirib ki, tarixi mübahisəli məsələləri həll etmək mümkün olmayıb, lakin bunun onun məqsədi olmadığını qeyd edib. Polşa prezidenti bir daha vurğulayıb ki, onun fikrincə, Ukraynada UPA-nın tərənnüm edilməsi gələcəkdə ölkənin Avropa İttifaqına üzvlüyü yolunda maneə yarada bilər. Bununla yanaşı, Navrotski Zelenskiyə Rusiyanı ümumi təhlükə hesab etdiyini təsdiqlədiyini və gələcək əməkdaşlığı müzakirə etdiklərini bildirib.

Son dövrlərdə Kiyev və Varşava arasında münasibətlər nəzərəçarpacaq dərəcədə pisləşib. Zelenskinin qərarını təkcə Navrotski deyil, həm də Polşanın liberal hökumətindəki siyasi rəqibləri qınayıblar. Onlar hesab edirlər ki, münaqişənin daha da dərinləşdirilməsi qəbuledilməzdir.

Zelenskinin Ağ Qartal ordenindən məhrum edilməsi barədə qərar hələ rəsmi qüvvəyə minməyib. Bununla belə, Ukrayna prezidenti mükafatdan özü imtina edib və ordeni poçt vasitəsilə Polşa prezidentinə geri göndərib. Ukraynanın keçmiş prezidentləri və digər tanınmış siyasətçilər də Polşa mükafatlarından imtina ediblər, eyni zamanda bəzi polşalı ictimai xadimlər Ukrayna mükafatlarını qəbul etməyiblər.

Polşada UPA – Ukraynanın müstəqilliyi uğrunda mübarizə aparmış silahlı təşkilat – İkinci Dünya müharibəsi zamanı Volın bölgəsində polşalı mülki əhaliyə qarşı kütləvi qırğınlar törətməkdə ittiham olunur.

Ukrayna isə UPA-nın nasistlərə və sovet hakimiyyətinə qarşı apardığı mübarizəni ön plana çəkir və tarixi dialoq aparmağa hazır olduğunu bildirir. Bununla yanaşı, vurğulayır ki, Ukraynanın öz tarixini necə şərh etməli olduğunu kənar şəxslər müəyyən etməməlidirlər.

Çərşənbə günü Avropa Parlamenti Ukraynanın Avropa İttifaqına üzvlük yolunda əldə etdiyi irəliləyişlə bağlı qətnamə qəbul edib. Qətnamədə Zelenskinin UPA-nın adının xüsusi təyinatlı bölmələrdən birinə verilməsi barədə qərarı pislənilib.

Sənəddə qeyd olunur ki, bu qərar “xoş qonşuluq münasibətlərinə xələl gətirir” və “Avropa dəyərləri ilə uzlaşmır”. Polşalı deputatlar qrupu bu müddəanın qətnaməyə daxil edilməsində israr edib və nəticədə sənəddə sağ müxalifəti təmsil edən digər polşalı deputatların təklif etdiyindən daha mülayim ifadələr seçilib.

 

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.