Somalinin paytaxtı Moqadişo şəhərində şənbə
günü iki güclü partlayış baş verib. Yerli hakimiyyət orqanları ən
azı 100 nəfərin öldüyünü, 300-dən çox insanın yaralandığını
bildirir.
Partlayışda "Əl-Şəbab" dini qruplaşması şübhəli bilinir. Hər iki
partlayış eyni yerdə-paytaxtın mərkəzində, insanların gur olan
kəsişməsində, Təhsil Nazirliyinin binasının yanında baş verib.
Birinci, partlayıcı ilə doldurulmuş bir avtomobil partlayıb, ikinci
partlayış isə polis və təcili yardım briqadasının hadisə yerənə
gəlməsindən sonra baş verib.
Beş il əvvəl, 2017-ci il oktyabrın 14-də eyni qovşaqda baş verən
partlayış nəticəsində 500-ə yaxın insan ölüb, 300 nəfər
yaralanıb.
Somali prezidenti hadisəni "vəhşi və qorxaq terror hücumu"
adlandırıb. O, hücumda “Əl-Şəbab”ı günahlandırıb. "Əl-Şəbab" adətən
hücumlara görə məsuliyyəti üzərinə götürmür.
"Əl-Şəbab" "Əl-Qaidə" və "Boko Haram"la əlaqəli radikal cihadçı
qrupdur. Onun yaraqlıları Somalinin kənd rayonlarının bir hissəsinə
nəzarət edirlər. Bu təşkilatın indiyə qədər Somalidə çoxsaylı
terror aktları həyata keçirdiyi, çoxsaylı mülki şəxsləri məhkəməsiz
edam etdiyi, hərbi bazalara hücumlar planlaşdırdığı bildirilir.