Gürcüstan idmançıları Almaniyada keçirilən yarışa hazırlaşırlar
“18-19 oktyabr tarixində
Almaniyanın Nordhorn şəhərində keçiriləcək “Dünya çempionatı”na
Gürcüstan idmançıları da qatılacaq”, – bu barədə
məlumatı "Marneuli" radiosu ilə söhbəti zamanı "Gorarxı" idman
klubunun baş məşqçisi və WFMC-Gürcüstan təşkilatının rəhbəri Tofiq
Əkbərov verdi.
Onun
sözlərinə görə, yarış Dünya Döyüş Növləri Federasiyasının
təşkilatçılığı ilə baş tutacaq və yarış Kikboks, Tayboks, K1 və
digər idman növləri üzrə keçiriləcək.
Əkbərovun sözlərinə görə, yarışa Marneulidən də iki idmançının
qatılması planlaşdırılır. Amma yarışda iştirak etmək üçün müəyyən
maliyyə vəsaitinə ehtiyac olduğundan, ola bilsin Marneulili
idmançılar bu yarışda iştirak edə bilməsin.
“5 nəfər Qardabani, 2 nəfər Tbilisi və 1 nəfər də
Rustavidən olan idmançılarımız var. Bu gün müəyyənləşəcək ki, onlar
gedəcəklər yoxsa yox. Marneulidən 2 idmançımız var, aparmaq
istəyirik, amma ailələrinin maddi durumu zəifdir. Rayon
bələdiyyəsi, rayon idman idarəsindən də vəsait ayırılmır. Qaldı ki,
imkanlı şəxslərdən maliyyə dəstəyi olarsa, aparacağıq, amma olmasa,
təəssüflər olsun ki, apara bilməyəcəyik”, - Tofiq
Əkbərov dedi.
T. Əkbərov ümid edir ki, Marneulidən yarışa qatılacaq olan iki
idmançıya imkanlı şəxslər tərəfindən köməklik göstəriləcək və onlar
da yarışda iştirak edə biləcəklər.