Marneulili idmançılar Rustavidə keçirilən çempionatda iştirak ediblər
14:07 / 01.07.2021
26-27 iyun tarixində Rustavi şəhərində “Beynəlxalq Xeyriyyə
Kikboksinq Çempionatı” keçirilib. Çempionatda Marneulili idmançı və
məşqçi Ramil Mehdiyevin tələbələri də iştirak edərək, uğur
qazanıblar.
Bu barədə “Marneuli” radiosuna Ramil Mehdiyev məlumat verdi. Onun
sözlərinə görə, o, çox sevinir ki, onun tələbələri həmin yarışdan
Marneuliyə medallarla qayıdıblar.
“26 iyun günü MMA döyüşü üzrə yarış keçirildi. Həmin
döyüşdə mənim 6 tələbəm iştirak etdi. 6 döyüşçüdən ikisi birinci
yerə, dördü isə ikinci yerə layiq görüldülər. 27 iyunda isə
kikboksinq üzrə turnir baş tutdu. O turnirdə isə 21 döyüşçümüz
iştirak edərək, gücünü sınadılar. Oradan da 17 çempionmuz oldu.
Yəni birinci yerə çıxdılar, 4 nəfəri isə ikinci yeri
qazandılar”, – Ramil Mehdiyev dedi.
Qeyd edək ki, 5-6 iyun tarixlərində Tbilisidə keçirilən peşəkar K1
və MMA döyüş üzrə beynəlxalq turnirdə iştirak edən Ramil Mehdiyev
qələbə qazanaraq, birinci yerə layiq görülüb. Belə ki, peşəkar K1
və MMA döyüş üzrə keçirilən yarışda 80 kq çəki dərəcəsində rinqə
çıxan Ramil Mehdiyev Türkiyəli rəqibini elə birinci raundda nokaut
edərək qələbə qazanıb.