1-4 iyul tarixlərində Tbilisi şəhərində “Gürcüstan Kikboksinq
(Wako) Çempionatı” keçirilib. Çempionatda Marneulili idmançılar da
iştirak ediblər.
Bu barədə “Marneuli” radiosu ilə söhbəti zamanı “Gürcüstan
Azərbaycanlı İdmançılar Birliyi”-nin sədri Tofiq Əkbərov məlumat
verdi. Onun sözlərinə görə, çempionata 24 idmançı ilə qatılıblar,
onlardan 15-i medal qazanıb.
“Bu çempionatda bütün yaş qruplarında idmançılarımız
iştirak edirdi. Marneulidən bu çempionata 24 idmançı qatılmışdı.
Onlardan 6-sı qızıl, 2-si gümüş, 7-si isə bürünc medal qazandılar.
Birinci yerə çıxan 6 idmançımız Gürcüstan çempionu adına layiq
görüldülər. Bununla yanaşı 16-ı rayon arasında keçirilən
çempionatda Marneuli komandası xal hesabına görə 2-ci yeri qazandı.
Birinci yerə isə Rustavi komandası çıxdı”, – Tofiq
Əkbərov dedi.
Əkbərov onu da əlavə etdi ki, əldə olunan nəticələrə görə, bu ilin
16-19 sentyabr tarixlərində Macarıstanın paytaxtı Budapeşt
şəhərində keçiriləcək “Wako-Dünya” çempionatında Marneulini 3
idmançı təmsil edəcək. Həmin idmançılar Gürcüstan yığmasının
tərkibində mübarizə aparacaqlar.