Gürcüstanın Bakuriani şəhərində təlim-məşq toplantısında olan
Azərbaycan Yunan-Roma güləşi üzrə milli komandasının üzvləri 23
yanvar tarixində Marneuliyə səfər ediblər.
Səfər çərçivəsində qonaqlar “Çay Evində” “Olimp İdman Məktəbi”nin
tələbələri ilə görüşüblər. Bu barədə “Marneuli” radiosu ilə söhbəti
zamanı idman məktəbinin Yunan-Roma güləşi üzrə məşqçisi Elçin
Mustafayev məlumat verdi. Onun sözlərinə görə, tanınmış
Azərbaycanlı idmançıların Marneuliyə səfəri onun tələbələrinə
stimul verib.
“Bazar günü Azərbaycandan gələn idmançıların boş vaxtı
olduğuna görə, onlar bizim rayona baş çəkdilər. Tanınmış
idmançılardan olan dünya və Avropa çempionu Rafiq Hüseynov, əslən
Dmanisidən olan Sənan Süleymanov, Eldəniz Əzizli və Orxan Nuriyev
bizim tələbələrlə görüşdülər. Onlarla idman sahəsində söhbətlər
etdilər. Bu görüş bizim tələbələr üçün gözlənilməz oldu. Çünki
bizim tələbələrimiz onları televiziyada və sosial medialarda
görürdülər. Amma indi onlar idmançıları canlı gördülər. Tələbələrdə
güvən yarandı ki, gələcəkdə onlar da tanınmış idmançılar olsun. Bu
görüş bizim tələbələrə stimul verdi. Onlar dünya və Avropa
çempionları ilə görüşdülər. Bu görüş yaxşı oldu”, –
Elçin Mustafayev dedi.
Görüşdən sonra idmançılar “Çay Evində” fəaliyyət göstərən kurslarla
tanış olublar.
Qeyd edək ki, Yunan-Roma güləşi üzrə Azərbaycan milli komandası
Bakuriani şəhərində Gürcüstan yığma komandası ilə birlikdə
təlim-məşq toplantısı keçirirlər. Təlim-məşq toplantısı yanvarın
7-də başlayıb, yanvarın 27-də isə sona çatacaq.