6 aprel tarixində Marneuli rayonunun Daştəpə kəndindən olan Elvin Ediqarov Honq Konqda keçirilən qol güləşi üzrə beynəlxalq yarışda birinci yeri qazanıb. O, “Armwrestling” üzrə illik reytinq turnirində böyüklər arasında keçirilən yarışda iştirak edib. İdmançı “Marneuli” radiosu ilə söhbəti zamanı bildirdi ki, o, 90 kq çəki dərəcəsində yarışda iştirak edib və bütün rəqiblərini məğlub edərək qələbə qazanıb.

“İki ay əvvəl idman zalında tanıdığım bir nəfərdən eşitdim ki, Honq Konqda beynəlxalq qol güləşi yarışı keçiriləcək. Mən də bu yarışda iştirak etmək qərarına gəldim və hazırlaşdım. Yarışda beş rəqibim var idi. Hamısını məğlub etdim. Sonuncu rəqibim isə Rusiyalı idmançı idi. Onu da məğlub edərək birinci yeri qazandım və ölkəmi, Gürcüstanımızı yenə də bu yarışda tanıtdım”.

Elvin əslən Marneuli rayonunun Daştəpə kəndindənir. Onun dediyinə görə, o, hal-hazırda Çinin Makao şəhərində yaşayır və 10 yaşından idmanla məşğul olur.

“Mən 10 yaşımdan idmanla məşğul oluram. İlk dəfə idmana Rusiyanın Tümen şəhərində kikboksla başlamışam. 2003-cü və 2004-cü illərdə orda kikboksinq üzrə birinci və ikinci yeri qazanmışam. ⁠2010-cu ildə isə bodibildinqlə məşğul olmağa qərar verdim. Hal-hazırda bodibildinqlə məşğul oluram. 2018-ci ildə Çinin Makao şəhərində bodibildinq yarışı keçirildi. Mən də yarışdım və birinci yeri tutdum. Ən son 2024-cü ilin 15 dekabr tarixində Çində keçirilən bodibildinq üzrə beynəlxalq yarış oldu. O yarışda da birinci yerə şıxdım. “Men's physique” bodibildinq kateqoriyasında böyüklər arasında keçirilən bir yarış idi. Həmin yarışda 15 ölkədən 60-dan çox idmançı iştirak etmişdi”.

35 yaşlı idmançının sözlərinə görə, o, heç kimin dəstəyi olmadan uğurlar qazanıb. O, çətinliklərə baxmayaraq beynəlxalq yarışlarda iştirak edir.

“Başqa bir ölkədə qalib gəldiyim hissləri sözlərlə ifadə edə bilmirəm. Amma onu deyə bilərəm ki, burda idmançılara çox yaxşı dəstək var və onlara böyük hörmətlə yanaşırlar. Amma bizim ölkədə bizə dəstək olan yoxdur. Bütün qazandığım uğurların hamısını öz hesabıma əldə etmişəm. Özüm həm idmanla məşğul oluram, həm də işləyib ailəmin ehtiyaclarımı qarşılamışam”.

Qeyd edək ki, Marneulili idmançı Elvin Ediqarov hal-hazırda Çində idman zallarının birində məşqçi kimi çalışır.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---