UEFA Çempionlar Liqasını Fransanın “Paris Saint-Germain” futbol klubunun heyətində qazanan futbolçu Xviça Kvaratsxelia Müqəddəs Qiorqi ordeni ilə təltif olunacaq. Həmçinin bu orden “gecikmiş şəkildə” keçmiş futbolçu Kaxa Kaladze (hazırda Tbilisi meri) və keçmiş basketbolçu Zaza Paçuliaya da veriləcək.

“Çempionlar Liqasını qazanmasına görə [Xviça Kvaratsxelia] Müqəddəs Qiorqi adına Qələbə Ordeninə təqdim olunacaq”, – bu barədə 3 iyun tarixində “Gürcü Arzusu” hökumətinin rəhbəri İrakli Kobaxidze hökumət iclasında bəyan edib.

Onun sözlərinə görə, “prezident [Mixeil Kavelaşvili] ona dövlətin ən yüksək mükafatını – Müqəddəs Qiorqi adına Qələbə Ordenini təqdim edəcək”.
İrakli Kobaxidze əlavə edib ki, Gürcüstanın iki digər tanınmış idmançısı – Kaxa Kaladze və Zaza Paçulia da var ki, onlar “ən yüksək klub turnirlərində ən yüksək mükafatlara layiq görülüblər”.

“O dövrdə bu cür mükafatlar almamışdılar. Düşünürəm ki, gec də olsa, onların bu uğurları qiymətləndirilməlidir”, – deyə Kobaxidze bildirib.
Müqəddəs Qiorqi adına Qələbə Ordeni – Gürcüstana əldə edilmiş qələbələrdə xüsusi xidmətləri olan şəxslərə təqdim edilir.
Orden 2004-cü ildə təsis olunub. İlk ordeni 2005-ci il mayın 10-da o dövrün prezidenti Mixeil Saakaşvili ABŞ-ın 43-cü prezidenti Corc Buşa təqdim etmişdi.

• Kaxa Kaladze – “Milan”ın heyətində iki dəfə, 2003–04 və 2006–07 mövsümlərində UEFA Çempionlar Liqasını qazanıb. 2012-ci ilin mayında futbol karyerasını başa vurub və sonra siyasətə qoşularaq “Gürcü Arzusu” ilə birlikdə seçkilərdə iştirak edib. Hazırda Tbilisi şəhərinin meri və “Gürcü Arzusu”nun baş katibidir.

• Zaza Paçulia – “Golden State Warriors” komandasında iki dəfə NBA çempionu olub. Hazırda NBA çempionluğu qazanmış yeganə gürcü basketbolçudur. O, 2019-cu ildə karyerasını başa vurdu və “Golden State” klubuna məsləhətçi kimi geri döndü. 2019-cu ilin avqustundan etibarən “Arki” inşaat şirkətinin həmtəsisçisidir və bu şirkət “Gürcü Arzusu”nun keçmiş deputatı İlia Tsulaia tərəfindən təsis olunub – Zaza onun biznes tərəfdaşıdır.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---