Bu gün, 29 may tarixində Bakıda “Cənub Qaz Dəhlizi”nin rəsmi açılış
mərasimi keçirildi. Açılış mərasimində bir sıra yerli və xarici
hökumət nümayəndələri iştirak edirdilər.
Açılış mərasimində iştirak edən Azərbaycan respublikasının
prezidenti İlham Əliyev Cənub Qaz Dəhlizinə ilk qazın vurulmasını
bildirən açarı işə salıb və Trans-Anadolu Boru Kəmərinə (TANAP) ilk
qazın vurulmasına başlanılıb.
Enerji dəhlizi Gürcüstan və Türkiyə ərazilərindən keçərək,
Azərbaycan qazının Avropaya verilməsini təmin edəcək.
Açılış mərasimi Bakının yaxınlığında yerləşən Səngəçal terminalında
keçirilib.
Onu da əlavə edək ki, İyunun 12-də Əskişəhərdə TANAP-ın istifadəyə
verilməsi ilə bağlı Azərbaycan və Türkiyə prezidentlərinin iştirakı
ilə rəsmi tədbir keçiriləcək.
Qeyd edək ki, Cənub Qaz Dəhlizi Cənubi Qafqaz Qaz Boru Kəmərinin
(Bakı-Tbilisi-Ərzurum) genişləndirilməsi, həmçinin Türkiyədə
Trans-Anadolu Boru Kəməri (TANAP) və Trans-Adriatik Boru Kəmərinin
(TAP) tikintisi üzrə layihədir.
Dəyəri 40 milyard ABŞ dolları olan Cənub Qaz Dəhlizi layihəsi
Xəzərin Azərbaycan sektorunda yerləşən “Şahdəniz” qaz-kondensat
yatağının istismarının ikinci mərhələsi çərçivəsində hasil ediləcək
qazın boru kəmərləri ilə Türkiyə və Avropaya nəqlini nəzərdə
tutur.