Daxili İşlər Nazirliyindən verilən məlumata görə, xüsusi rabitə
sirrini pozmaq, bir qrup tərəfindən kompüter sisteminə icazəsiz
daxil olmaq və külli miqdarda oğurluq etmək ittihamı ilə üç nəfər
həbs edilib və bir yetkinlik yaşına çatmayan şəxs ifşa olunub.
İstintaqa görə, şübhəlilər "fişinq" yolu ilə vətəndaşların bank
hesablarından ümumilikdə 72 500 lari mənimsəyiblər.
“Araşdırma nəticəsində yetkinlik yaşına çatmayan şəxsin İnternet
banklardan birinə bənzər bir "fişer" səhifə yaratdığı və həmin
səhifənin linkini "Facebook" sosial şəbəkəsində paylaşaraq yaydığı
ortaya çıxıb. O, internet istifadəçilərinə uduşda iştirak
etmələrini təklif edib. Vətəndaşlar aldanaraq fərdi bank
məlumatlarını "fişer" səhifəsinə daxil edirdilər və bu məlumatlar
avtomatik olaraq müttəhimlərin əlinə keçirdi. Təqsirləndirilənlər
bu məlumatlardan istifadə edərək, aldadılmış vətəndaşların
hesablarındakı vəsaitləri mənimsəyib, bundan sonra pulları
həmkarlarının bank hesablarına və rəqəmsal valyuta hesablarına
köçürüblər.
Təqsirləndirilən Q.A., adı çəkilən cinayətdə təqsirləndirilən digər
şəxslərə - O.A. və B.A.-ya oğurlanmış pulları sonradan nəğd ala
biləcəkləri elektron cüzdan sisteminə qeydiyyatdan keçirməyi vəd
edib.
Təqsirləndirilən şəxslər 8 vətəndaşın bank hesabından qanunsuz
olaraq ümumilikdə 72 500 lari ələ keçirib”, - deyə
DİN-in açıqlamasında bildirilib.
Hadisə ilə bağlı Gürcüstan Cinayyət Məcəlləsinin xüsusi rabitə
sirrini pozmaq, bir qrup tərəfindən kompüter sisteminə icazəsiz
daxil olmaq və külli miqdarda oğurluq etməni nəzərdə tutan 158-ci
maddəsinin 3-cü və 4-cü hissəsinin "A" bəndinə, 284-cü maddəsinin
2-ci hissəsinin "A" və "D" bəndinə, həmçinin, 177-ci maddənin 3-cü
hissəsinin "A" bəndinə və 4-cü hissəsinin "B" bəndinə əsasən
istintaq aparılır.
Cinayətə görə 6 ildən 10 ilədək həbs cəzası nəzərdə tutulur.