Mən Türkəm, Türk kimi də öləcəm! - Aşıq Nargilə Mehdiyeva Dmanisoba bayramı haqqında danışdı - Video
Bu
gün, 26 iyul tarixində Dmanisi rayonunda keçmiş “Elat” indiki
“Dmanisoba” bayramı qeyd olunur.
“Marneuli” radiosu ilə müsahibəsi zamanı “Dmanisoba” bayramında
iştirak edən aşıq Nargilə Mehdiyevanın sözlərinə görə, Dmanisidə
hal-hazırda Elat bayramı qeyd olunmayacaq dərəcədədir.
Nargilə Mehdiyeva deyir ki, əvvəllər bu bayramı qeyd etmək üçün,
İrandan, Türkiyədən, Azrəbaycandan qonaqlar gəlirdi və Elat
bayramına böyük maraq göstərilirdi. Lakin bu gün bayram
abu-havasını hiss etmək olmur. O, insanların bu günə əvvəlki qədər
maraq göstərməmələrini Elat bayramının adının dəyişdirilib
Dmanisoba olması ilə əlaqələndirdi. N. Mehdiyeva deyir ki, hər nə
qədər Gürcüstan vətəndaşı olsaq da biz etnik azlıq olaraq öz
mədəniyyətimizi, milli dəyərlərimizi qorumalıyıq.
“Bu il çox təəssüf ki, Elata gələnlərin sayı keçən ilə
baxanda azalıb. Mənə elə gəlir ki, Elat bayramının adının dəyişib
Dmanisoba olması ilə əlaqədardır. Keçən il İran, Türkiyə,
Azərbaycandan bir iki nəfər də olsa qonaq gələn olmuşdu bu il heç
kimi görmək olmurdu. Azərbaycan musiqisi bu gün səsləndirilmədi
əslində doğru da oldu, mən razıyam. Biz Gürcüstanda yaşayırıq amma
haqqımızdır birlik, bərabərlik adlanan Elat baramını qeyd edək Türk
dünyası bu bayramı qeyd etsin. Demək olar ki, bu il bu bayramı tək
mən və tələbələrim qeyd etdik”, - aşıq Nargilə
Mehdiyeva dedi
Nargilə Mehdiyeva deyir ki, gücünün çatdığı qədər hər il Dmanisiyə
gedəcək və bu bayramı tələbələri ilə də olsa qeyd edəcək. O, deyir
ki, bunu yaşlı nəsil etməsə də gənclər birlik olaraq öz
adət-ənənələrini yaşada bilərlər. Mehdiyeva bildirdi ki, bu hər
kəsin haqqıdır ki, ildə bir dəfə də olsa öz adətlərini,
mədəniyyətlərini sərgiləsin, bayramlarını qeyd etsin.
“Böyüklərimizdən deyil, gənclərdən istəmək lazımdır, heç
olmazsa 26 iyulu qoruyub saxlasınlar, bu bayramı keçirsinlər. Tək
mənlə alınmır yaxşı olar ki, türk dünysından da qonaqlar olsun amma
mən yenə də tələbələrimlə hər il gedəcəm və bu bayramı gücüm
çatdığı qədər qeyd edəcəm. Mən düşünürəm ki, biz özümüzü
danmamalıyıq. Məni öldürsələr də mən harada yaşayıramsa orada öz
mədəniyyətimi qorumaq haqqımdır. Mən Türkəm! Türk kimi də öləcəm!”,
- Nargilə Mehdiyeva deyir
Xatırladaq ki, Borçalı türklərinin "Elat" mədəniyyət günləri
2009-cu il iyul ayının 26-da “Borçalı” Cəmiyyəti tərəfindən əsası
qoyulmuş və hər il eyni tarix və eyni məkanda keçirilirdi. "Elat"
bayramı Dmanisi rayonunun Armudlu gölünün yaxınlığında təntənəli
şəkildə keçirilirdi. Keçirilən el şənliyinə Azərbaycandan,
Türkiyədən və başqa ölkələrdən yaşayan Azərbaycanlı türklər buraya
gələrək "Elat" bayramında görüşürdülər.
Bu bayramda şənliklər, at yarışları, güləş, rəsm sərgiləri,
biri-birindən maraqlı mədəniyyət güşələri, pəhləvanların çıxışları
və s. kimi maraqlı adət ənənələr nümayiş etdirilirdi. 2016-cı ildən
Kvemo Kartli qubernatorluğu və Dmanisi rəhbərliyinin qərarı ilə
bayramın keçirilməsinə qadağa qoyuldu. Həmin vaxtdan eyni tarixdə
"Dmanisoba" adlanan yeni bayram tədbiri keçirilməyə başlanıldı.
Bayramın hansı səbəbə görə ləğv olunması isə ictimaiyyətə məlum
deyil.
Nargilə Mehdiyeva Armudlu kəndində şagirdləri ilə
ARMUDLU Kəndi - ELAT BAYRAMI VIDEO MÜƏLİF JOZEF ALEKSANDR SMİT