25 yanvar tarixində Marneuliyə səfərindən sonra Qardabaniyə gedən
Almaniyanın Gürcüstandakı səfiri Hubert Knirşi “BEEZ” Uşaq
Teatrında olub. Səfər çərçivəsində teatrın fəaliyyəti ilə
maraqlanan səfir teatrda yaradılan şəraitlə tanış olub.
Tanışlıqdan sonra teatrın azyaşlı aktyor və aktrisalarının
hazırladığı kiçik səhnəciklər nümayiş etdirilib. “BEEZ” Uşaq
Teatrının bədii rəhbəri Binəli İslamoğlu “Marneuli” radiosu ilə
söhbəti zamanı bildirdi ki, bu görüş onlar üçün çox əhəmiyyətli
olub.
“Cənab Hubert Knirşi görülən işlərin təqdirəlayiq
olduğunu qeyd etdi. Qardabanidə belə bir teatrın fəaliyyətinin
sevindirici hal olduğunu dedi. Hətta onu da qeyd ki, uşaqlarla
çalışmağın çox çətin olduğunu yaxşı bilir və bu işdə bizə uğurlar
arzuladı. Cənab Hubert Knirşinin teatrımızı ziyarət etməsi teatrın
kollektivi üçün çox gözəl və əhəmiyyətli bir gün oldu. Biz
teatrımızın inkişafı üçün əlimizdən gələni edəcəyik”,
– “BEEZ” Uşaq Teatrının bədii rəhbəri Binəli İslamoğlu dedi.
Görüşün sonunda səfir teatrın uşaqlarına hədiyyələr verib. Daha
sonra isə xatirə şəkli çəkdiriblər.
Qeyd edək ki, Almaniya səfiri Hubert Knirşi 25 yanvar tarixində
Xuldərədə, Marneuli meriyasında və Marneuli Çay Evində gənclərlə
görüş keçirib. Səfirin son görüşü “Beez” Uşaq Teatrında olub.