29 dekabr tarixində Tbilisidə Aşıq Kamandarın 90
illik yubileyi və Dünya Azərbaycanlılarının Həmrəylik Günü
münasibəti ilə tədbir keçirilib.
Tədbir zamanı Parlamentin keçmiş deputatı Ruslan Hacıyev, professor
Mahmud Kamaloğlu və Aşıq Novruz Məmmədov Aşıq Kamandarın
yaradıcılığına həsr olunmuş medalla təltif olunublar.
Ruslan Hacıyev “Marneuli” radiosu ilə söhbəti zamanı bildirdi ki,
mükafata layiq görülmək onun üçün qürurverici hissdir. Hacıyevin
sözlərinə görə, yubiley yüksək səviyyədə keçirilib. O, bu kimi
tədbirlərin tez-tez keçirilməsini arzu edir.
“Çox yüksək ab-havada Aşıq Kamandarın 90 illik
yubileyini keçirdik. Azərbaycanın Gürcüstandakı səfiri, cənab Faiq
Quliyev tərəfindən təşkil olunmuş bir tədbir idi. Biz də dəvət
olunduq. Səfirliyə də təşəkkür edirəm ki, bu cür tədbirlərin
keçirilməsində çox fəal şəkildə çalışırlar. Məsafə uzaq olsa da,
tədbir iştirakçılarının hər biri böyük həvəslə gəlmişdilər. Tez-tez
belə tədbirlərin keçirilməsi vacibdir. Aşıq Kamandar bizim böyük
sənətkarımız olub. Aşıq Kamandar muzeyinin dövlət statusu almasında
millət vəkili olaraq mənim də əməyim olduğuna görə, düşünürəm, ona
görə məni Aşıq Kamandar medalı ilə təltif etdilər. Mən hər kəsə
təşəkkür edirəm”.
Professor Mahmud Kamaloğlunun sözlərinə görə, Aşıq Kamandarın həyat
və yaradıcılığı onun hər zaman maraq dairəsində olub. O, Aşıq
Kamandarın 90 illik yubileyinə həsr olunmuş tədbirin tezliklə
Türkiyədə də baş tutacağını bildirdi.
Kamaloğlu deyir ki, Aşıq Kamandar yalnız Borçalının deyil, bütün
türk dünyasının unudulmaz sənətkarıdır.
“Mən Aşıq Kamandarın 90 illiyi münasibəti ilə bütün
sənətsevərlərimizi, türk dünyasını təbrik edirəm. Ona görə təbrik
edirəm ki, bizim Borçalı türk dünyasına Aşıq Kamandar kimi ustad
sənətkar bəxş edib. Aşıq Kamandar özünün yerişi-duruşu ilə bir aşıq
etalonuna çevrildi. Bu aşığın ardınca çox böyük bir Aşıq Kamandar
məktəbi yarandı. Onun üzünü görməsə də, eşitməsə də, bu gün özünü
Aşıq Kamandar hesab edən yüzlərlə şagird var. Bu bizim üçün çox
böyük fəxrdir. Biz bu gün bunu keçiririk ki, biz bu gün qürur hissi
keçiririk ki, Aşıq Kamandarı görmüşük, onun məclislərində olmuşuq.
Yaxın zamanlarda, ola bilsin yanvar ayında Aşıq Kamandarın yubileyi
Tbilisidə də keçirilsin. Azərbaycanda da keçirildi. İranda isə
hazırda vəziyyət qarışıq olduğuna görə orada keçirilmir. Amma
onların təbrik məktubları var idi. Bu günə qədər çox kitablarım
çıxıb. Amma Aşıq Kamandar haqqında ayrıca bir kitabım çap olunub.
Bundan başqa Aşıq Kamandar muzeyinin yenidən qurulmasında mən
danışman idim və 6 ay orada işləmişəm. Mən folklorşünasam və bütün
aşıqları tanıyıram. Sanki Aşıq Kamandara nisbətən daha çox vaxt
ayırmışam. Gələcəkdə Hüseyn Saraçlının haqqında da bunu edəcəyəm.
Hüseyn Saraçlının 100 illiyini 2016-cı ildə keçirdik. Aşıq Əmrahın
da, Xındı Məmmədin də yubileyini belə keçirəcəyik. Çox yaxşı olardı
ki, onların da muzeyləri olsun”.
Qeyd edək ki, medalla təltif olunan Aşıq Novruz Məmmədov sağlamlıq
vəziyyəti ilə əlaqədar olaraq tədbirdə iştirak edə bilmədi. Onun
mükafatı isə oğlu İspəndiyar Məmmədova təqdim olundu. O, da
çıxışında atasını bu mükafata layiq gördükləri üçün təşkilatçılara
təşəkkürünü bildirdi.
Tədbirdə Azərbaycanın Gürcüstandakı səfiri
Faiq Quliyev Mirzə Fətəli Axundovun 210 illiyinə həsr olunmuş
medalla təltif edildi. Mükafatı Axundov ev muzeyinin direktoru
Leyla Əliyeva tərəfindən təqdim olundu.
Onu da əlavə edək ki,
28 dekabr tarixində Axundov muzeyinin təşkil etdiyi
“Gücümüz Həmrəyliyimizdədir” adlı tədbirdə
Filoloq Oqtay Kazımov da Mirzə Fətəli Axundovun 210
illiyinə həsr olunmuş medalla təltif edildi. Bununla yanaşı
tədbirdə çıxış edən iştirakçılara və jurnalistlərə də muzey
tərəfindən xüsusi mükafatlar təqdim olundu.
Jurnalistlər arasında "Marneuli" radiosunun
əməkdaşı Amil Məmmədovun adı da var.
Tədbirdə Azərbaycan və Türkiyə respublikalarının səfirləri və
səfirliklərin əməkdaşları, "TİKA" təşkilatının nümayəndələri,
Gürcüstan hökumətinin nümayəndələri, ziyalılar, gənclər və dəvət
olunmuş qonaqlar iştirak edirdilər.
Qonaqların çıxışlardan sonra tədbir aşıqların ifaları ilə davam
etdi. Aşıqların çıxışları tədbir iştirakçılarının alqışları ilə
qarşılandı.
Qeyd edək ki, tədbir Azərbaycan Respublikasının Gürcüstandakı
Səfirliyinin, Azərbaycan Respublikasının Diasporla İş üzrə Dövlət
Komitəsinin, Azərbaycan Diasporuna Dəstək Fondunun və Aşıq Kamandar
ev muzeyinin təşəbbüsü ilə keçirildi.