3–4 may tarixlərində Bakının tarixi mərkəzi olan İçərişəhərdə keçirilən Beynəlxalq Xalça Festivalı 10 ölkədən gələn iştirakçıları bir araya gətirib.

Festivalda hər ölkə özünəməxsus xalçaçılıq ənənələrini nümayiş etdirib.

Gürcüstanı bu tədbirdə ReWoven komandası təmsil edib. Komanda festivalda Borçalı xalça mədəniyyətini təqdim edərək Gürcüstanı təmsil edən ilk iştirakçılardan olub. Bu, həm ReWoven komandası, həm də ümumilikdə Gürcüstan üçün ilk beynəlxalq xalça festivalı olub.

“Bu, bizim üçün olduqca əhəmiyyətli addım idi. Biz təkcə xalça toxumuruq – Gürcüstanın xalça irsini yaşadır və gələcək nəsillərə ötürürük. Festival həm rəngarəng, həm də ruhlandırıcı idi. Borçalı xalçaları ilə ölkəmizi fəxrlə təmsil etdik”, – deyə ReWoven komandasının üzvləri bildiriblər.

ReWoven layihəsi 2014-cü ildə Ryan Smith tərəfindən yaradılıb. Yarandığı gündən bu yana komanda Borçalı xalçaçılıq ənənələrinin qorunması və tanıdılması istiqamətində fəaliyyət göstərir.

“Biz qədim naxış və texnikalara yeni həyat verməyə çalışırıq. Çünki xalçalar sadəcə dekorativ əşyalar deyil – onlar yaddaşı, kimliyi və tarixi daşıyan dəyərlərdir”, – deyə ReWoven bildirir.

Layihə əsasən Kosalar və Qaraçöp kəndlərindən olan yerli toxucularla əməkdaşlıq edir. Bu kəndlərdə xalçaçılıq sənəti nəsildən-nəslə ötürülərək yaşadılır.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---