“Gürcü Arzusu” parlamentin və nazirliklərin “Arsenal dağında” yerləşdirilməsini və hazırkı inzibati binaların özəlləşdirilməsini nəzərdən keçirir.
Bunun üçün Bələdiyyə İnkişaf Fondu bazarın araşdırılması məqsədilə tender elan edib.

“Arsenal dağı” Tbilisinin Çuğureti rayonunda yerləşir və bu ərazidə əvvəllər hərbi hissə fəaliyyət göstərirdi.
Elan olunan tenderə əsasən, “Hökumət şəhərinin” baş planının və eskiz layihələrinin hazırlanması üçün xidmətin satın alınması nəzərdə tutulub. Hökumət şəhərinin yaradılması təxminən 77 hektarlıq ərazidə planlaşdırılır.

Hökumət şəhərində yerləşdirilməsi nəzərdə tutulan binalar:
• Parlament binası – ən azı 31 350 m²
• Hökumət Administrasiyası – ən azı 7000 m²
• Tədbirlər zalı – ən azı 10 000 m²
• Xarici İşlər Nazirliyi – ən azı 7500 m²

Bu obyektlərin təhlükəsiz və fasiləsiz fəaliyyəti üçün ətrafında hasar nəzərdə tutulmalıdır.
Ofis binaları:
• İnfrastruktur Nazirliyi – ən azı 20 700 m²
• Regional İnkişaf Nazirliyi – ən azı 3200 m²
• Qaçqınlar, Əmək, Səhiyyə və Sosial Müdafiə Nazirliyi – ən azı 51 900 m²
• İqtisadiyyat və Davamlı İnkişaf Nazirliyi – ən azı 23 800 m²
• Ətraf Mühitin Mühafizəsi və Kənd Təsərrüfatı Nazirliyi – ən azı 47 400 m²
• Təhsil, Elm və Gənclər Nazirliyi – ən azı 7600 m²
• Mədəniyyət Nazirliyi – ən azı 3600 m²
• Tbilisi Meriyası – ən azı 59 900 m²
• Gürcüstan Dövlət Mühafizə Xidməti – ən azı 7000 m²
• Gürcüstanın Barışıq və Vətəndaş Bərabərliyi məsələləri üzrə dövlət naziri aparatı – ən azı 1800 m²
• Təsərrüfat və yardımçı təyinatlı tikililər
Tender şərtlərinə görə, bazar araşdırılması üçün 4 ay ayrılıb.
Bugün, 10 dekabrda, “Gürcü Arzusu”nun baş naziri İrakli Kobaxidze bildirib ki, mövcud inzibati binaları elə qiymətə satmağı planlaşdırırlar ki, yeni binaların tikintisini maliyyələşdirmək mümkün olsun.
“Bizim dövlət qulluqçularının çox zaman iş şəraiti qənaətbəxş deyil. Buna görə belə planımız var ki, bəzi qurumların binaları satılsın və həmin məbləğ hesabına yeni binalar inşa edilsin. Bu, iqtisadi aktivliyi ikiqat artıracaq. Hələlik hansı qurumlara aid olacağı dəqiqləşdirilməyib. Bir tərəfdən yeni tikililər iqtisadi inkişafı stimullaşdıracaq, digər tərəfdən inzibati binaların investisiya məqsədilə özəlləşdirilməsi də iqtisadi aktivliyi artıracaq. Yəni, sıfırdan başlayaraq bu layihə ilə ikiqat iqtisadi canlanma əldə edə bilərik ki, bu da əlavə olaraq iqtisadi artıma töhfə verəcək,” – deyə Kobaxidze bildirib.
______________________________________
Hökumət şəhərinin tikilməsi ideyası “Gürcü Arzusu” hakimiyyəti tərəfindən ilk dəfə 2017-ci ildə səsləndirilmişdi. O vaxtkı baş nazir Qiorqi Kvirikaşvili bildirmişdi ki, hökumət şəhəri Ortaçala ərazisində tikiləcək və demək olar ki, bütün nazirliklər burada yerləşəcək. Hazırda Ortaçalada Maliyyə, Ədliyyə və Daxili İşlər nazirlikləri və bir çox dövlət qurumu fəaliyyət göstərir. Eləcə də “Gürcü Arzusu”nun yeni mərkəzi ofisi bu ərazidə yerləşir.
2025-ci ilin avqustunda baş nazir İrakli Kobaxidze Bələdiyyə İnkişaf Fonduna hökumət şəhərinin tikintisi üçün lazım olan detallı layihə-smeta sənədlərinin (o cümlədən şəhərsalma sənədlərinin) hazırlanması xidmətinin satın alınmasını tapşıran sərəncam imzalayıb.
“Arsenal dağı” ilə bağlı isə, Tbilisi meri Kaxa Kaladzenin şirkəti 2007-ci ildə “Milli Hərəkat” hakimiyyəti dövründə bu ərazidəki 78 hektar torpağı 38 milyon ABŞ dollarına almışdı və burada çoxfunksiyalı kompleks tikilməliydi. Kaladze məbləğin 19 milyonunu ilk ildə ödəmişdi, qalan hissə isə 2008-ci ilin sonunadək tamamlanmalı idi. Lakin “Arsenal Development” müddətə uyğunlaşa bilmədi və bunu dünya iqtisadi böhranı və 2008-ci il Rusiya–Gürcüstan müharibəsi ilə izah etdi. 2011-ci ildə İqtisadiyyat Nazirliyi şirkətlə müqaviləni ləğv etdi.
2024-cü ildə Kaxa Kaladze bəyan etmişdi ki, 2011-ci ildən sonra bu şirkətlə onun heç bir əlaqəsi yoxdur.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---