Gürcüstan Parlamenti üçüncü oxunuşda gender kvotasını
dəstəkləyib.
Qanuna edilən dəyişikliklərə əsasən partiyalar 2028-ci ilə qədər
Parlament seçkilərində MSK-ya elə siyahı təqdim etməlidir ki, hər
dördlükdə ən az bir namizəd digər cins nümayəndəsi olsun, əks halda
partiya qeydiyyatdan keçməyəcək.
Dəyişikliklər yerli özünüidarə seçkilərinə də aiddir. 2028-ci ilin
yerli özünüidarə seçkilərinə qədər partiyalar MSK-nın müvafiq rayon
təşkilatlarına hər ikinci namizədin digər cinsdən olduğu siyahı
təqdim etməlidir.
Gender kvotasını “Avropalı Gürcüstanın” və “Vahid mİlli Hərəkatın”
Marneuli rayon təşkilatının rəhbərləri dəstəkləmir.
“Avropalı Gürcüstanın” Marneuli rayon təşkilatının rəhbəri Əhməd
İmamquliyev bildirdi ki, 2021-ci ildə keçiriləcək yerli özünüidarə
seçkilərində siyasi partiyalar Marneulidə qadınları seçki
siyahısına daxil etməkdə çətinlik çəkəcək.
“Marneuli bələdiyyəsində təəssüf ki, siyasi həyatda
fəal olan çox sayda qadın yoxdur. İndi Marneuli Bələdiyyə
Məclisində 35 üzv var və dəyişikliklərə əsasən belə çıxır ki,
onların yarısı qadın olmalıdır. Təəssüf ki, Marneuli bələdiyyəsində
siyasi baxımdan 17 nəfər fəal qadın tapa bilmərik”, -
Əhməd İmamquliyev dedi.
İmamquliyevin sözlərinə görə, o, heç vaxt kvota tərəfdarı olmayıb
və olmayacaq da. Partiya siyahıları isə namizədlərin cinsiyyətinə
görə deyil, təcrübəsinə və siyasi fəallığına əsasən tərtib
olunmalıdır.
Gender kvotası ilə bağlı “Vahid Milli Hərəkatın” Marneuli rayon
təşkilatının rəhbəri Aqil Mustafayevin də mövqeyi eynidir. Onun
sözlərinə görə, VMH ötən illərdə keçirilən seçkilərdə gender
baxımından balanslaşdırılmış siyahılar tərtib edirdi.
“Qanun qəbul edənə kimi də bizim partiyanın proqramında
gender bərabərliyi var idi. Mənim fikrimcə gender kvotası haqqında
söhbət olmamalıdır, çünki ola bilsin kişilərdən çox qadın siyasətçi
olsun. Diskriminasiyalı qanun layihəsi olmamalıdır. Kvota ilə
əlaqədar qanun layihəsini dəstəkləmirik, çünki ilk növbədə əsas
olan kişi ya qadının müvafiq təhsili və təcrübəsinin olmasıdır ki,
Parlamentə, yaxud Bələdiyyə Məclisinə qoşula bilsin”,
- Aqil Mustafayev dedi.
Müxalifət partiyalarının nümayəndələrindən fərqli olaraq Marneuli
Bələdiyyə Məclisinin sədri Amiran Qiorqadzenin gender kvotası ilə
bağlı mövqeyi fərqlidir. Onun sözlərinə görə, Marneulidə müxtəlif
istiqamətlərdə fəallıq göstərən çox sayda qadın var.
“Biz çox görüşlərdə demişik ki, gender kvotası lazımdır və
düşünürəm ki, düzgün qərar qəbul edilib. Doğrudur, bugünkü
Bələdiyyə Məclisində qadınlar yoxdur,
amma Aparatda əksəriyyət qadındır və fəal şəkildə proseslərə
qoşulublar. Düşünürəm ki, kvota özünü doğruldacaq və vəziyyət
yaxşıya doğru dəyişəcək”, - Amiran Qiorqadze
bildirdi.
Gender kvotasını Marneuli Bələdiyyə Məclisinin İctimaiyyət, Mətbuat
və QHT sektoru ilə əlaqələr və gender şöbəsinin sədri İa Esebua da
müsbət dəyərləndirir. Onun sözlərinə görə, kvota sistemini qəbul
etməklə Marneulidə Bələdiyyə Məclisinin tamamilə kişilərdən ibarət
olmayacağına zəmanətimiz olacaq.
“Parlamentə adamlar güclə daxil olduğu halda, bəzi adamlar bu
qanunu diskriminasiya hesab edir. Statistikaya əsasən ali təhsil
müəssisəsini daha çox qız bitirir və düşünürəm ki, onlara siyasi
həyata qoşulmaq üçün real şans veriləcək. Eləcə də qadınlar müəyyən
məsələlərlə bağlı daha həsassdırlar. Məsələn, kəndə içməli su
çəkilməsi, təhsil məsələsində və.s. Bu birbaşa məişət ilə əlaqəli
və kişilərdən çox qadınlar üçün problem olan
məsələdir”, – İa Esebua dedi.
Gender mütəxəssisi Nona Samxaradze “Marneuli” radiosu ilə söhbəti
zamanı bildirdi ki, indiyə qədər qadınlar siyasi proseslərdən
təcrid ediliblər. Bu dəyişiklikdən sonra isə adamlar siyasətin
qadınların işi olduğuna alışacaqlar.
“Patriarxal ictimaiyyətdə qarşılaşdığımız sünii şəkildə
çirkinləşdirilmiş maneələr sınacaq və hesab edin ki, biz qadınlar
öz təbii mövqeyimizə qayıdırıq. Nümayəndəlik adı daşıyan orqanlar
həqiqətən də nümayəndəlik olacaq. Çünki ictimaiyyət ilk növbədə iki
kateqoriyaya bölünür – qadınlar və kişilər. Sonra etnik, gender,
cinsi istiqamət, dini mənsubiyyət və.s gəlir. Qadınlar üçün maneə
yaradan bu çirkinləşdirilmiş sistem sındırılmalıdır”,
- Nona Samxaradze bildirdi.
Gender mütəxəssisi qanunvericilik orqanına peşəkar olmayan
qadınların düşə biləcəyi kimi gümanlara da münasibət bildirdi.
Samxaradzenin bildirdiyinə görə, bu halda səlahiyyət siyasi
partiyalara və seçicilərə verilir. Bir tərəfdən partiyalar müvafiq
təhsili və peşəkarlığı olan qadınları cəlb etməlidir, digər
tərəfdən isə seçicilər düzgün qərar qəbul etməlidir və səs verənə
qədər partiya siyahılarına yaxşı baxmalıdırlar.