2020-ci ilin Parlament seçkilərinə 9 gün qalır. Marneuli
bələdiyyəsində siyasi partiyalar və majoritar deputatlığa
namizədlər 31 oktyabr üçün hazırlaşır.
Marneulidə ümumilikdə 14 majoritar namizəd qeydiyyatdan keçib.
“Marneuli” radiosu majoritar deputatlığa namizədlərin gender
bərabərliyi ilə bağlı nə düşündüyü və Gürcüstanda qadınların siyasi
həyata qoşulmasını problem hesab edib-etmədikləri ilə
maraqlandı.
“Marneuli” radiosunun müsahibə yazdığı namizədlərin əksəriyyəti
hesab edir ki, Marneulidə, eləcə də bütün Gürcüstanda qadınların
siyasi, yaxud sosial həyatda iştirakı problemli məsələdir.
Baxmayaraq ki, majoritar deputatlığa namizədlər üçün qadınların
siyasi fəaliyyətlərə qoşulması problemlidir, onların bu məsələnin
həlli ilə bağlı fərqli baxışları var.
“Şalva Natelaşvili-Gürcüstanın Leyboristlər partiyasının” majoritar
deputatlığa namizədi Əli Bədirov:
“Hesab edirəm ki, nümayəndəlik baxımından bizim
partiyada qadınlar heç də məhdudlaşdırılmayıb. Biz Parlamentdə çox
sayda qadın və kişilərin olmasının tərəfdarıyıq. Ancaq bu
cinsiyyətlə deyil, təhsil, potensial, dövlət dilini yüksək
səviyyədə bilmək kimi meyarlarla müəyyən edilməlidir. Bu meyarlar
cinsiyyətdən daha üstündür. Çox sayda xanımların kvota xoşuna
gəlir, ancaq mən kvotanı vacib islahat saymıram. Hesab edirəm ki,
qadınların işlə təmin edilməsi kvota olmadan baş verməlidir.
Düşünürəm ki, Gürcüstanda bu baxımdan vəziyyət çox ağırdır. Bir
halda ki, ölkənin birinci şəxsi qadındır, dövlət orqanlarında,
bələdiyyələrdə də çox sayda xanımlar işləyir. Mən hesab edirəm ki,
özünü həssas qrupdan hesab edən qadın zəifliyi öz günahıdır, çünki
çox sayda xanımlar indi təhsil alır, ali məktəbi bitirir və
işləyir.”
“Bakradze, Uqulava, Bokeria – Avropalı Gürcüstan – Azadlıq üçün
Hərəkat”-ın Marneuli və Qardabanidən majoritarlığa namizədi Əhməd
İmamquliyev:
“Mən heç vaxt kvotanın tərəfdarı olmamışam və
olmayacağam da. Mənim fikrim budur ki, fəal, peşəkar adam istədiyi
yerə özü gedib çatmalıdır. Amma bugünkü vəziyyət başqadır. Deyə
bilmərik ki, qadınların hüququ tapdalanmır, təəssüf ki, tapdalanır
və bu əsasən də bizim regionda baş verir. Bizim etnik azlıq
gənclərinin dövlət dilini bilməməsi dövlətin günahıdır. Ancaq biz
bir şey təklif edirik ki, təhsil alan, dövlət dilini bilən qadın və
qızlara işləmək imkanı yaratmalıyıq və işlə təmin etməliyik. Bu
partiyalardan başlamalıdır. Siz bilirsiniz ki, yerli ofisdə bizim
artıq bir neçə xanım işçimiz var və biz onların validyenləri ilə də
söhbət etdik, bu baxımdan heç bir problem yoxdur. Mən hesab edirəm
ki, vəzifəli şəxslərin siyasi icazəsi ilə qızların ailəsinə qədər
getməli və təklif etməliyik ki, bu qızlara işləmək üçün imkan
versinlər.”
“Lelo – Mamuka Xazaradze” partiyasının Marneuli və Qardabanidən
majoritarlığa namizədi Murad Muradov:
“Mən hesab edirəm ki, bu yalnız bizim regionun deyil,
bütün Gürcüstanın və Qafqazın problemidir. Qadınlar mülki həyatda
iştirak etmirlər, ancaq bunun üçün mütləq şərait yaradılmalıdır. Bu
şərait ilk növbədə siyasi subyektlər tərəfindən yaradılmalıdır.
Məsələn, biz, “Lelo” majoritarların təqdim olunmasında da kvotanı
qoruduq. Heç bir siyasi partiyanın “Lelo”-da olduğu qədər qadın
namizədi yoxdur. Proporsional siyahıda Seçki Məcəlləsi bizi buna
məcbur edir. Ancaq majoritar siyahıda bu tənzimlənmir və biz yenə
də qadın majoritar deputatlığa namizədlərimizi təqdim etdik.
“Lelo”-nun bütün ofislərində onikilik, qadın şuraları yaratdıq.
Həmin şuraya siyasi fəaliyyətlərdə iştirak etmək istəyi olan qadın
və qızlarımız qoşulub. Bu şura ona görə yaxşıdır ki, həmin qadınlar
yerli özünüidarə seçkilərinə hazırlaşırlar. Çünki biz bilirik ki,
yerli özünüidarə seçkilərində proporsional siyahıda hər ikinci
namizəd qadın olmalıdır.”
“Levan Çaçua, Quram Palavandaşvili – Gürcü İdeyası”-nın Marneuli və
Qardabanidən majoritar deputatlığa namizədi Oleqi Devadze:
“Marneulidə qadınlar tərəfindən siyasətə qoşulmaq
yoxdur. Mən düşünürəm ki, müəyyən addımlar atmaq vacibdir ki,
qadınlar fəallaşsın. İşləmək lazımdır və qadınlara siyasi mövzuları
izah etməliyik. Marneuli spesifik regiondur. Yəqin qadınların
marağı yoxdur və maraqlandırmalıyıq.”
“Davit Çiçinadze Tribuna” partiyasının Marneuli və Qardabanidən
majoritarlığa namizədi Aşot Muradyan:
“Qadınlar siyasi fəaliyyətlərdə az iştirak edir,
ümumiyyətlə görünmürlər. Mən qadınların siyasətdə iştirakına qarşı
deyiləm, ancaq bu göstəriş üçün olmamalıdır. Qadın siyasətdə öz
istəyinə görə iştirak etməlidir, partiyalar qadınları yalnız
görünmək üçün cəlb etməməlidirlər.”
“Salam” paltforması Marneulidə azərbaycanlı icmanın ehtiyacları,
problemləri barədə araşdırma aparıb. Araşdırmanın bir qismi etnik
azlıq nümayəndəsi olan qadınlarla bağlıdır.
“Salam” siyasi partiyaları araşdırmanın aşkara çıxardığı məsələlərə
istinadən etnik azlıq nümayəndəsi olan qadınları müvafiq resurs və
platformalarla cəlb etməyə və gücləndirməyə çağırır. Eləcə də
namizədlərin qeyri-dominant etnik qrup nümayəndəsi olan qadınların
problemini, təcrübələrini dərk etməsi üçün partiyaları öz
namizədləri ilə işləməyə, digər tərəfdən isə qeyri-dominant etnik
qrup nümayəndəsi olan qadınları vacib hədəf qrup olaraq hesab
etməyə və onların qarşısında duran problemlərin həlli yolu barədə
söhbət açmağa çağırır.