Azərbaycan səfiri Faiq Quliyev Abxaziya Muxtar Respublikası Hökumətinin başçısı Ruslan Abaşidzeni qəbul edib
11 noyabr tarixində Azərbaycan Respublikasının Gürcüstandakı səfiri
Faiq Quliyev Abxaziya Muxtar Respublikası Hökumətinin başçısı
Ruslan Abaşidzeni qəbul edib.
Bu barədə Azərbaycanın Gürcüstandakı səfirliyindən məlumat
verilib.
Məlumata görə, səfir görüşün tarixi günlərdə baş tutmasının rəmzi
xarakter daşıdığını diqqətə çatdırıb. O, təqribən 30 il ərzində
davam edən təcavüzə, Azərbaycan torpaqlarının işğalına son
qoyulmasının, ölkənin ərazi bütövlüyünün bərpa olunmasının nəinki
təkcə Azərbaycan, bütün region üçün müsbət dəyişikliklər
gətirəcəyini deyib.
Faiq Quliyev Azərbaycanla Gürcüstan arasında uğurla inkişaf edən
qarşılıqlı faydalı münasibətlərin bütün Cənubi Qafqaz bölgəsinin
sabitlik, təhlükəsizlik və hərtərəfli inkişafı baxımından vacib rol
oynadığını qeyd edib. Görüşdə iki ölkənin qarşılıqlı əsasda
bir-birinin suverenliyi və ərazi bütövlüyünün dəstəkləməsi və
beynəlxalq müstəvidə həmrəylik göstərməsi də mühüm amil kimi önə
çəkilib.
R.Abaşidze Azərbaycanın ərazi bütövlüyünün bərpa olunması
istiqamətində əldə etdiyi son tarixi qələbə münasibətilə təbrik
edib. Abxaziya bölgəsindən olan məcburi köçkünlərin vəziyyəti və
münaqişə ətrafında hazırkı vəziyyət barədə bəhs edən Abaşidze bu
istiqamətdə görülən işlər barədə səfirə ümumi məlumat verib. O,
həmçinin Gürcüstan, Azərbaycan və Türkiyə arasında bərqərar olunmuş
əməkdaşlıq formatının da əhəmiyyətini vurğulayıb.
Görüşün sonunda tərəflər gələcəkdə məhsuldar təmasların davam
etdiriləcəyinə dair əminlik ifadə ediblər.