Gürcüstanın hakim “Gürcü Arzusu” partiyasının sədri, milyarder
Bidzina İvanişvili ikinci dəfə siyasəti tərk edir.
"Vəzifəmi yerinə yetirdiyimi düşünürəm. Nəhayət
siyasətdən çıxıb, idarəetmədən tamamilə uzaqlaşmaq qərarına gəldim.
Partiya sədrliyi vəzifəmlə yanaşı partiyanın özündən də ayrılıram
və 2011-ci ilədək olan həyat tərzimə qayıdacağam", –
deyə "Gürcü Arzusu-Demokratik Gürcüstan"-ın sədri Bidzina
İvanişvili bu gün yayımladığı yazıda qeyd edib.
Bidzina İvanişvilinin sözlərinə görə, iqtidar komandası bu gün
bütün siyasi fiqurlar arasında həqiqətən ən yaxşısı və
alternativsizidir.
“İqtidar komandası bu gün bütün siyasi fiqurlar
arasında həqiqətən ən yaxşısı və alternativsizidir. Əminəm ki, bu
komanda işimi, səlahiyyət və bacarığımı ləyaqətlə əvəz edə
bilər", – deyə yazıda qeyd edilib.
Bidzina İvanişvilinin sözlərinə görə, "Gürcü Arzusu"-nun
seçkilərdəki uğurunu obyektiv təhlil etsək, onun gözlənilən və
məntiqli olduğunu söyləyə bilərik.
“Buna görə də vəzifəmin tamamlandığına inanıram.
Nəhayət siyasətdən çıxıb, idarəetmədən tamamilə uzaqlaşmaq qərarına
gəldim. Partiya sədri vəzifəsindən və öz partiyamdan da ayrılıb
2011-ci ilədək olan özəl həyat tərzimə qayıdıram.
Bir neçə həftəyə altmış beş yaşım olacaq ki, bu da siyasi karyeramı
bitirmək qərarımın ən vacib amillərindən biridir. Gənclərdən ilham
alaraq bu addımım nəticəsində vəziyyət nəinki zəifləməyəcək, əksinə
daha da güclənəcək, hakim partiyanı daha canlı və motivasiyalı
edəcək, tərəfdarlarımızı həvəsləndirəcək və hökuməti daha enerjili
edəcək.
Siyasətdən qürurlu, qalib və xalqın minnətdarlığı ilə ayrılıram.
İnsanlar mənim ölkə və dövlət maraqları naminə göstərdiyim səyləri
görə bildilər. Əminəm ki, Gürcüstan xalqı siyasətə gəlişimdəki eyni
maraqların diktəsi ilə hazırkı hərəkətimi də
qiymətləndirəcək", – deyə Bidzina İvanişvili
bildirib.
Qeyd edək ki, milyarder B.İvanişvili 2012-2013-cü illərdə
Gürcüstanın baş naziri olub. O, 2013-cü ildə siyasətdən getsə də,
2018-ci ildə yenidən siyasətə qoşulub və həmin ilin mayından hakim
partiyaya rəhbərlik edib.