Gürcüstanın keçmiş prezidenti Mixeil Saakaşvili bildirib ki, bu gün
onu Qori xəstəxanasından zorla köçürməyə cəhd ediblər, bu zaman o,
huşunu itirib.
Bu barədə Saakaşvilinin vəkili və Mtavari kanalının təsisçisi Nika
Qvaramiyanın jurnalistlərə oxuduğu Saakaşvilinin məktubunda
yazıb.
“Bu gün məni aparmağa gəldilər, saat altının yarısı olardı, qara
rəngli paltar geyinmişdilər, məni aparacaqlarını bildirdilər, amma
hara gedəcəyimizi demədilər. Mən təzyiqimi və nəbzimi yoxlamağı
xahiş etdim, təzyiqim 180 idi, ikinci halda, ikinci ölçmədə artıq
200/110 idi. Normal qan təzyiqim 120/80-dir. Bu, mənim fikrimcə,
hipertansif böhran idi. Mən təzyiq və nəbz baxımından heç vaxt belə
vəziyyətdə olmamışam.
Onlar məni məcburi aparmağa cəhd etdikləri zaman müqavimət
göstərdim, bundan sonra huşumu itirdim və müəyyən bir zaman
kəsiyini xatırlamıram. Özümə gələndə həkim başımın üstündə dayanıb
dedi ki, daha heç yerə getməyəcəksən, xəstəxanada qalacaqsan. Mənə
də dedilər ki, həkimlərimi içəri buraxacaqlar, amma buraxmırlar.
Bu, həyatımda yaşadığım ən ağır böhran idi. Bütün bu müddət
ərzində, o cümlədən tibbi problemlər zamanı video çəkirdilər. Mənim
vəziyyətimin ağır olması videoya çəkilib”, - deyə Mixeil
Saakaşvilinin məktubunda yazılıb.
Qvaramia klinikaya daxil olmaq hüququnu tələb edir. O, insidentə
görə öz etirazını bildirib və Ukrayna dövlətini, eləcə də Xalq
Müdafiəçisini münasibət bildirməyə çağırıb.
Nika Qvaramiyanın sözlərinə görə, Saakaşvilinin həbsxanaya
qayıtması xəstəxana həkiminin verdiyi forma 100 sənədinin əsasında
planlaşdırılır. O, həmçinin deyib ki, Saakaşvili Qori Hərbi
Hospitalında reabilitasiya oluna bilməyəcəyi üçün onu Gürcüstanda
və ya xaricə referal klinikaya köçürmək lazımdır.
Mənbə:
Netgazeti