İranın Mazandaran ostanındakı Amül şəhərinin apteklərindən biri bağlanıb. Buna səbəb aptek sahibəsinin yerli mollanın hicab tələbini rədd etməsi olub.

İnternetdə geniş yayılmış videoda adının doktor Foruq Haqpənah olduğu deyilən aptek sahibəsinin mollanın ondan hicab qaydasına əməl etmək barədə tələbini rədd etməsi görünür. Aptekdə baş vermiş qarşıdurmadan sonra işçilər mollaya xidmət göstərməkdən imtina ediblər.
Molla bu zaman smartfonunu çıxarıb və baş verənləri videoya alıb.

Mazandaran ostanının ədliyyə rəhbəri Məhəmməd Sadeq Əkbəri sözü gedən aptekin bağlanmasına əmr verib.

Əmrdə bunun səbəbi kimi “hicab qaydasına əməl olunmaması və bir müştəriyə xidmətdən imtina edilməsi” göstərilir.

Əkbəri əlavə edib ki, aptek sahibəsinə qarşı hüquqi tədbirə göstəriş verilib.

اعتراض متصدی داروخانه‌ای در آمل به «تذکر حجاب» یک معمم؛
ویدئوی منتشرشده در شبکه‌های اجتماعی مربوط به اعتراض متصدی داروخانه‌ای در آمل به «تذکر حجاب» یک معمم است که بازخورد زیادی داشته است.
۱/۲ pic.twitter.com/fqfuzfE3U0

— RadioFarda‌|‌راديو فردا (@RadioFarda_) January 29, 2023

Hicabdan başlanan hərəkat

İranda ötən sentyabrda deyilənə görə hicab qaydasını pozması ilə bağlı polis məntəqəsinə aparılan və orada vəfat edən 22 yaşlı Məhsa Əmininin ölümünün ardınca başlanan etirazlar hələ də səngimək bilmir.

Son aylarda bütün İranı bürümüş etirazlarda hicab prinsipial məsələyə çevrilib.

Bir çox qadınlar hicablarını açır və yandırır.

Hakimiyyət etiraz aksiyalarına qəddar zorakılıqla reaksiya göstərir.



İnsan haqları təşkilatları indiyədək etirazlarda 500-dən çox insanın öldürüldüyünü, yüzlərlə xəsarət alanların olduğunu bildirir.

Bundan başqa etirazlarla bağlı jurnalistlər, vəkillər, fəallar və başqaları da daxil minlərlə şəxs saxlanıb.

Bunların bir çoxuna qarşı ölüm cəzası nəzərdə tutan ittihamlar irəli sürülüb.