Xüsusi Tapşırıqlar Departamentinin Operativ Planlaşdırma Şöbəsinin rəhbəri İrakli Şaişvelaşvili Gürcüstan Daxili İşlər Naziri Vaxtanq Gomelauriyə vəzifəsindən azad olunması ilə bağlı müraciət edib.
Şaişvelaşvili bildirib ki, onun istefasının səbəbi ailə şəraitidir. O, müraciətində qeyd edib:

"Xahiş edirəm, ailə şəraiti ilə əlaqədar məni tutduğum vəzifədən azad edib Gürcüstan Daxili İşlər Nazirliyi sıralarından tərxis edəsiniz."

İrakli Şaişvelaşvili bu bəyanatını öz şəxsi “Facebook” səhifəsində yayımlayıb və paylaşımına Gürcüstan və Avropa İttifaqının bayraqlarını əlavə edib. Hazırda Daxili İşlər Nazirliyi bu bəyanata rəsmi reaksiya verməyib, Şaişvelaşvilinin şəxsi paylaşımı isə sosial şəbəkədə müxtəlif reaksiyalara səbəb olub.

İrakli Şaişvelaşvili Xüsusi Tapşırıqlar Departamentində mühüm vəzifə tuturdu. Onun istefasının nazirliyin operativ fəaliyyətinə təsir göstərə biləcəyi ehtimal edilir, lakin hələlik bu vəzifəni kimin tutacağı məlum deyil.

“Marneuli” radiosu vəziyyətin necə inkişaf edəcəyini izləməyə davam edəcək və ictimaiyyətə ən yeni məlumatı təqdim edəcək.