Salam Platforması Gürcüstandakı böhranlı vəziyyətlə bağlı bəyanat yayıb. Onların fikrincə, ölkədə dövlət qurumları faktiki olaraq dağıdılıb və heç bir institut xalqın tələblərini təmin edə bilmir.

"Dövlət institutları dağıdılıb" – bəyanatda deyilir.
"Xalq nə keçmiş seçkiləri, nə də mövcud hakimiyyəti tanıyır. Beynəlxalq təşkilatlar Gürcüstandan yeni seçkilərin təyin edilməsini və siyasi məhbusların azad edilməsini tələb edirlər."

Avropa Assambleyası artıq bu məsələ ilə bağlı qətnamə qəbul edib və bir çox ölkə dinc nümayişçilərə qarşı zorakılıq, şiddət və qeyri-insani rəftara görə Gürcüstanın yüksək vəzifəli şəxslərinə sanksiyalar tətbiq edib.

"Gürcüstan siyasi təcridə doğru irəliləyir"

Platformanın bəyanatına görə, Gürcüstan hər gün daha çox siyasi təcridə qərq olur və zorakı idarəetmənin xüsusiyyətlərinə uyğunlaşır. Bu idarəetmə repressiv siyasətə əsaslanır və dinc vətəndaşlara qarşı zorakılıqla müşayiət olunur.

"Etirazçılar azadlıq uğrunda mübarizə aparır"

"Ölkə daxilində demokratiya, azadlıq və Avropa gələcəyi uğrunda ciddi mübarizə gedir," –bəyanatda deyilir.

Bu proseslərdə çox sayda etirazçı qanunsuz olaraq həbs edilib. Onların sırasında "Batumelebi" və "Netqazeti"-nin direktoru Mzia Amağlobeli də var. O, artıq 19 gündür ki, aclıq aksiyası keçirir.

"Onun susdurulması bütün cəmiyyətin susdurulması deməkdir"

Platforma Amağlobelinin aclıq aksiyasını ədalətli mübarizə hesab edir və ona həmrəylik ifadə edir.

"Onun həyatı və sağlamlığı hazırda ciddi təhlükə altındadır. Onun susmağa məcbur edilməsi yalnız şəxsi məsələ deyil, həm də bütün cəmiyyətin problemi və insanları susdurmaq, ifadə azadlığını məhdudlaşdırmaq deməkdir," – bəyanatda bildirilir.
"Etiraz artıq bölgələrə də yayılıb"

Platformanın məlumatına görə, etiraz aksiyaları artıq yalnız Tbilisi ilə məhdudlaşmır və bölgələrə də yayılıb.

"Dünən Dmanisidə ictimai fəal və “Görüş Yeri”-nin təsisçisi Laşa Çxvimiani baş verən proseslərə etiraz olaraq aclıq aksiyasına başlayıb," –platforma nümayəndələri bildirirlər.
Platformanın mövqeyi

"Biz inanırıq ki, xalq mütləq ədalətli mübarizədə qalib gələcək!"

Siyasi məhbuslara azadlıq!
Mzia Amağlobeliyə azadlıq!
Laşa Çxvimianiyə həmrəylik! – deyə gənc fəallar bəyan edirlər.