"Batumelebi" və "Netgazeti"-nin təsisçisi Mzia Amağlobeli 21 gündür aclıq aksiyası keçirir.
"Gürcü Arzusu" nümayəndələri bildirirlər ki, bu onun hüququdur və onun azadlığa buraxılması nəzərdə tutulmur. Mzia Amağlobeli həbsxanadan göndərdiyi məktubda qeyd edib ki, o, güzəşt əldə etmək üçün deyil, zorakı sistemə etiraz etmək məqsədilə aclıq elan edib. O, həmçinin qeyd edib ki, ona zor tətbiq edən və üzünə tüpürən polis əməkdaşından üzr istəmək fikrində deyil.




Dmanisili fəal Laşa Çxvimişvili artıq üçüncü gündür aclıq aksiyası elan edib.
Anası oğlunun aclıq aksiyasına başladığını eşitdikdən sonra özü də yeməkdən imtina edib. Laşa Çxvimişvili bildirir ki, ölkədə baş verən ədalətsizliklər səbəbindən başqa cür davrana bilməzdi.



Bu gün "Gürcü Arzusu" partiyasına tabe olan polis bir neçə mülki fəalın evində axtarış aparıb.
Onlardan biri, İsako Devidze həbs olunub və onun harada olduğu hələ də məlum deyil. Devidzenin evindən anasının bankdan əməliyyat üçün götürdüyü pul müsadirə edilib. Eyni zamanda, ən böyük "Facebook" qrupunun təsisçiləri Nensi Volandi və İlo Qlontinin də evlərində axtarış aparılıb. Qlonti polis idarəsinə aparılıb, Nensi Volandiyə isə dindirilmə əmri təqdim olunub. Axtarış zamanı Nensinin anasına zor tətbiq edilib və telefonu əlindən alınıb.



Fəallar bu hadisələri sabah üçün planlaşdırılan aksiya ilə əlaqələndiriblər.
2 fevralda Ağmaşenebeli meydanında və Tbilisi Mall yaxınlığında yolların bağlanması planlaşdırılır.

Daxili İşlər Nazirliyi xəbərdarlıq edib ki, əgər sabah Tbilisi Mall yaxınlığında aksiya baş tutarsa, iştirakçılar həbs olunacaqlar.
Nazirliyin bəyanatına görə, strateji əhəmiyyətli yolların bağlanması qanunla qadağandır və iştirakçılar 4 ilə qədər həbs cəzası ilə üzləşə bilərlər.



Buna baxmayaraq, etiraz əlaməti olaraq vətəndaşlar sosial mediada aksiyanın mütləq keçiriləcəyini bildirirlər.
Sosial şəbəkələrdə hökumətin repressiv tədbirlərinə qarşı çıxmaq məqsədilə heç bir təhdidin aksiyanı dayandıra bilməyəcəyi barədə çağırışlar yayılıb.