Gürcüstanın Mərkəzi Seçki Komissiyasının sədri Qiorqi Kalandarişvili, ölkəsində “Gürcü Arzusu” ilə birlikdə seçkilərin saxtalaşdırılmasında ittiham olunan şəxs, Tacikistan seçkilərini müşahidə edib.

Bu məlumat ilk olaraq rus mediasında yayılıb və Gürcüstan MSK-sı onu "Azadlıq Radiosu"na təsdiqləyib.

Tacikistan sərt məhdudlaşdırılmış siyasi və vətəndaş hüquqları olan avtoritar dövlətdir.

5,5 milyon seçicinin qeydiyyatda olduğu ölkədə 2 mart, bazar günü parlamentin aşağı palatasına – Nümayəndələr Palatasına və yerli özünüidarəetmə orqanlarına seçkilər keçirilib. Rəsmi nəticələrə görə, hakim partiya qələbə qazanıb.

Müxalifətsiz seçkilər

Tacikistan MSK-nın məlumatına görə, ölkədə qeydiyyatdan keçmiş yeddi partiyadan altısı seçkilərdə iştirak edib. Onların arasında prezident Emomali Rahmonun rəhbərlik etdiyi Xalq Demokratik Partiyası da var.

Lakin "Azadlıq Radiosu"nun Tacik xidməti bildirir ki:

• Seçkilərdə iştirak edən heç bir partiya prezident Rahmonun partiyasını tənqid etmir;
• Yeganə real müxalifət partiyası olan “Tacikistan Sosial-Demokrat Partiyası”nın lideri Şokircon Xakimov “dövlət çevrilişinə cəhd” ittihamı ilə 2024-cü ildən etibarən 18 il həbs cəzasına məhkum edilib;
• 2015-ci ildə “İslam Dirçəliş Partiyası” qadağan edildikdən sonra ölkədə yalnız bu partiya müxalifət hesab olunur.

ATƏT indiyə qədər Tacikistan seçkilərini, o cümlədən 2020-ci il prezident seçkilərini daim müşahidə edib, lakin 2025-ci ildə Tacikistanda seçki missiyasını ləğv edib.

Bu qərarı ATƏT fevralın 3-də elan edib. Səbəb isə Tacikistan hakimiyyətindən müşahidəçilərə akkreditasiya və vəzifələrini icra etmək üçün zəruri zəmanətlərin alınmaması olub.

Seçki missiyası 22 yanvarda açılmasına baxmayaraq, seçki ekspertləri işə başlaya bilməyib.

Son illərdə Tacikistan hökuməti müxalif fikirlərə qarşı sərt tədbirlər görüb, müxalif siyasətçiləri həbs edib və ya ölkəni tərk etməyə məcbur edib.

Onlarla müstəqil jurnalist, aktivist və hakimiyyət tənqidçisi uzunmüddətli həbs cəzasına məhkum edilib.

Beynəlxalq insan hüquqları təşkilatları Rahmon hakimiyyətini mütəmadi olaraq media azadlığına, vətəndaş cəmiyyətinə və siyasi plüralizmə hörmətsizlikdə ittiham edirlər.

Tacikistan hökuməti seçkilər zamanı “Azadlıq Radiosu”, BBC və digər beynəlxalq media qurumlarına akkreditasiya verməyib. Akkreditasiya yalnız yerli dövlət mediasına və bəzi rus mətbuat orqanlarına verilib.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---