Gürcüstan Prokurorluğunun məlumatına görə, onun tələbi əsasında Tbilisi Şəhər Məhkəməsi bu gün

, 17 mart tarixində beş təşkilatın bank hesablarını və həmin hesablarda olan vəsaiti dondurub.
Bu QHT-lər və xeyriyyə təşkilatları aksiyalar üçün lazımi inventarın alınması və aksiyalar zamanı saxlanılan şəxslərin ailələrinə yardım göstərməkdə günahlandırılır. Prokurorluq bu yardımı “qanunsuz və cinayətkar fəaliyyətə təşviq” kimi qiymətləndirib.

Səbataj və düşmənçilik fəaliyyətinə yardım işi üzrə istintaq bu ilin fevral ayında açılıb.

Prokurorluğun açıqlamasında bildirilir ki, bu təşkilatlar toplanmış maliyyə vəsaitlərinin böyük hissəsini qrup halında zorakılığın təşkilinə və iştirakına görə ittiham olunan şəxslərə və onların ailələrinə maliyyə yardımı göstərmək üçün istifadə edirlər. Beləliklə, yalnız zorakı hərəkətləri maliyyələşdirməklə kifayətlənməyərək, onlar qeyri-qanuni fəaliyyətə maddi fayda məqsədilə insanları cəlb etmək üçün stimullaşdırıcı əsas yaradırlar.

Prokurorluğun tələbi ilə aşağıdakı təşkilatların hesabları dondurulub:

• Xeyriyyə fondu “Nanuka Fondu”
• Xeyriyyə fondu “Frosferiti”
• Xeyriyyə fondu “Bir-birimiz üçün 24/7”
• Qeyri-hökumət təşkilatı “Utanc”
• Qeyri-hökumət təşkilatı “Tbilisi İnsan Haqları Evi”

Prokurorluq bildirir ki, bu təşkilatlardan edilən pul köçürmələrinin təyinat hissəsində aşağıdakı ifadələr yazılıb: "Aksiya üçün lazımi avadanlıq", "Mübarizə üçün lazımlı şeylər", "Aksiya üçün inventarın alınması", "Pirotexnika almaq üçün", "Mübarizə aparan uşaqlar üçün qaz maskası almaq" və s.

Prokurorluğun açıqlamasında vurğulanır ki, bu fondların təşkilati və maliyyə fəaliyyəti hüquq pozucularına və onların ailələrinə maddi yardım göstərmək məqsədinə xidmət edir. Bu təşkilatlar hüquq pozucularının cərimələrini ödəyir və onların fərdi və ya təşkilati məsələlərinin həllinə kömək edirlər.

2024-cü il 28 noyabrdan bəri 100 gündən çox müddət keçib – bu müddət ərzində Gürcüstanda yeni seçkilərin keçirilməsi tələbi ilə etirazlar davam edir. Aksiyalar “Gürcü Arzusu” partiyasının 2028-ci ilə qədər Avropa İttifaqına üzvlük üçün danışıqlar aparılmayacağına dair qərarına qarşı başlayıb.

Etirazların ilk günlərində polis etirazçıları dağıtmaq üçün su şırnaqları, bibər qazı və gözyaşardıcı qazdan istifadə edirdi. Aksiya iştirakçıları isə xüsusi avadanlıqlardan istifadə edərək özlərini qorumağa və etirazlara qayıtmağa çalışırdılar.

Aksiyalar başladıqdan sonra “Gürcü Arzusu” etirazları məhdudlaşdırmaq üçün qanunları sərtləşdirdi – mitinqlərdə lazer işıqlarının və maskaların istifadəsi qadağan olundu, yolların bağlanmasına və polis əmrlərinə tabe olmamağa görə cərimələr artırıldı, inzibati həbs müddəti isə 15 gündən 60 günə qədər uzadıldı.

Bütün bu məhdudiyyətlərə baxmayaraq, etirazlar dayanmadı. Adları çəkilən fondlar isə cərimələnən vətəndaşlara dəstək olmağa davam edirdi.

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---