Gürcüstanın Xəstəliklərə Nəzarət və İctimai Sağlamlıq üzrə Milli Mərkəzinə (NCDC) yeni direktor təyin olunub. Bu vəzifəni İrakli Purtseladze icra edəcək.

Mərkəzin yeni rəhbərini kollektivə hakim "Gürcü Arzusu" partiyasının səhiyyə naziri Mixeil Sarjveladze təqdim edib. Onun sözlərinə görə, Purtseladzenin peşəkar təcrübəsi və idarəçilik bacarıqları ölkənin ictimai səhiyyə sisteminin gücləndirilməsinə töhfə verəcək.

Səhiyyə Nazirliyinin məlumatına əsasən, İrakli Purtseladzenin uzun illər özəl sektorda rəhbər vəzifələrdə iş təcrübəsi var. O, 2002-ci ildən 2024-cü ilə qədər “Aversi-Pharma” şirkətində müxtəlif rəhbər vəzifələrdə çalışıb, 2011–2023-cü illərdə isə şirkətin baş direktoru olub. Paralel olaraq, 2016–2018-ci illərdə sığorta şirkəti “Alfa”nın müşahidə şurasının sədri vəzifəsini də icra edib.

Xəstəliklərə Nəzarət Milli Mərkəzinin rəhbəri vəzifəsi Amiran Qamkrelidze istefa verdikdən sonra 2022-ci ilin avqustundan boş qalmışdır. Bundan sonra NCDC-nin icraçı direktoru əvvəlcə Tamar Qabunia, sonra isə Paata İmnadze müvəqqəti icra etmişdir.

“Sərhədsiz Şəffaflıq – Gürcüstan” təşkilatının CompanyInfo platformasının məlumatına görə, İrakli Purtseladze “Agri Management Group of Georgia” adlı fındıq istehsalı şirkətində pay sahibidir və 2012-ci il seçkiləri ərəfəsində “Vahid Milli Hərəkat” partiyasına 50 min lari ianə edib.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---