“Qərar ədalətsizdir, siyasi motiv daşıyır” – rəhbərlik məktəbin bağlanması barədə
14:54 / 01.03.2023
1 mart tarixində, Marneuli Təhsil-Resurs Mərkəzinin qarşısında özəl
məktəbin bağlanmasına görə, etiraz aksiyası keçirilib. Təhsil
müəssisəsinin administrasiyası, müəllimlər, şagirdlər, valideynlər
hesab edirlər ki, “Davit Ağmaşenebeli adına Məktəb-Litsey”-in
avtorizasiyası ədalətsiz şəkildə ləğv olunub.
Özəl məktəbdə həyata keçirilmiş monitorinq zamanı aşkarlanan
pozuntulara görə təhsil prosesi 8 mart tarixində dayandırılacaq.
Məktəbin direktor müavini qərarın ədalətsiz olduğunu hesab edir və
“məktəbin bağlanmasının siyasi məsələ” olmasından şübhələnir. O,
hesab edir ki, məktəbdə aparılan növbədənkənar monitorinq və
ekspert qrupunun hesabatda qeyd etdiyi çatışmazlıqlar məktəbin
fəaliyyətinin dayandırılmasına səbəb olmamalıdır.
“Davit Ağmaşenebeli Məktəb-litseyi” 2010 ildə təsis
edilib. Təsis olunduğu gündən məktəb Təhsil Keyfiyyətinin İnkişafı
Mərkəzi tərəfindən həyata keçirilmiş avtorizasiya və monitorinqdən
uğurla keçdi. Şura tərəfindən cari ilin 27 fevralında qəbul edilmiş
qərar ədalətsiz, siyasi motivlidir. Davit Ağmaşenebeli
Məktəb-Litseyinin tərkibində olan başqa məktəblərin ətrafında son
beş il ərzində cərəyan edən hadisələr prosesin siyasi xarakterli
olduğunu təsdiq edir. 2016 ildən eyni yolla Dəmirəl adına özəl
kollec, Batumi Məktəb-Litseyi, Nikoloz Tsereteli adına Beynəlxalq
Məktəb və Şota Rustaveli adına məktəb-litseyin avtorizasiyası ləğv
olundu”.
“Davit Ağmaşnebeli adına Məktəb-Litseydə” oxuyan uşaqlardan birinin
valideyni Tamar Qonadze hesab edir ki, məktəbdə aparılan proses
uşaqların marağına zərər vurmamalıdır. O, şagirdlərin tədris ili
bitənə qədər qalan üç ayı yenə həmin təhsil müəssisəsində
keçirmələrini tələb edir. “Məktəbin bağlanmasının iki səbəbi var – dedilər. Biri
budur ki, qapalı zalın ölçüsü kiçikdir, ikincisi isə müəllimin
yeddi uşaqla bağlı qiymətləndirilməsinin eyni olduğunu qeyd
etdilər. Bizim toplanmağımızın səbəbi budur ki, tədris ilinin
ortasında, bitməyə üç ay qalmış məktəbin bağlanması uşaqlar üçün
uyğun deyil. Uşaqları məktəbdən çıxarmaq və ədalətsiz olaraq başqa
məktəblərə bölmək düzgün deyil. Mənim uşağım birinci sinifdədir və
dəqiq bilirəm ki, çox böyük problemləri olacaq. Gəlin, özümüzü
toplayaq, uşaq hüquqlarını qoruyuruqsa, onların hüquqlarını qoruyaq
və tədris ili başa çatsın. Başqa etirazları olarsa, məktəblə
danışsınlar və əgər qərar qüvvədə qalarsa, ilk növbədə uşaqların
hüquqlarını qoruyacağıq”.
İngilis dili müəllimi Tamar Arçvadze də şuranın qərarına etirazını
bildirir.
“Mən müəllimliklə yanaşı magistratura tələbəsiyəm. Mənim
üçün tədris ilinin ortasında işimi itirmək çox çətindir. İndiki
mərhələdə heç yerdə vakansiyalar elan olunmur və pulsuz qalıram.
Eləcə də dünən uşaqlarla görüş çox emosional idi, onlar emosional
travma alıblar”.
Etiraz aksiyası zamanı toplaşanlar Marneuli Təhsil Resurs
Mərkəzinin rəhbəri Əli Qəhrəmanovun bayıra çıxmasını və onlarla
görüşməsini tələb edirdilər.
Valideynlər binaya girmək və birbaşa söhbət aparmaq qərarı
veriblər.
Təhsil-Resurs Mərkəzindən bildirdilər ki, onların avtorizasiya
prosesi ilə heç bir əlaqəsi yoxdur və yeganə göstərə biləcəkləri
dəstək uşaqların məktəblərə bölünməsi ilə bağlı ola bilər.
“Resurs Mərkəz vasitəçidir, biz əmrləri qəbul edirik.
Yalnız və yalnız həyata keçirənlərik. Biz nazirlikdən qəbul olunan
qətnamələri yerinə yetiririk. Məktəb avtorizasiyadan keçə bilməyib
və növbəti mərhələni yuxarıdakılar necə deyirsə, elə aşmalıyıq. Ona
görə də biz belə hərəkət edirik ki, heç bir şagird təhsildən kənar
qalmasın, artıq şəhərin gürcüdilli məktəblərində, gürcü sektorunda
1-dən 6-cı sinfə qədər neçə boş yerin olduğunu araşdırmışıq. Bundan
əlavə 2 və 6 saylı məktəbdə həmin şagirdlər üçün 1-ci sinif
açılacağını vəd edirlər. 274 boş yer tapmışıq”, –
Resurs Mərkəzin nümayəndəsi İrma Davadze bildirdi.
Valideynlər Resurs Mərkəzin uşaqların məktəblərə bölünməsi təklifi
ilə razılaşmırlar və təhsil müəssisəsinin fəaliyyətinə davam
etməsini tələb edirlər. Təhsil nazirinə müraciət etməyi də
planlaşdırırlar. Həmçinin, məhkəməyə şikayət də verilib.
“Marneuli” radiosu Milli Təhsil Keyfiyyətinin İnkişafı Mərkəzindən
də təfərrüatları araşdırmağa çalışacaq. Material yenilənəcək