Marneuli etnik və dil müxtəlifliyinin gündəlik həyatı müəyyən etdiyi, Gürcüstanın çoxmillətli bələdiyyələrindən biridir. Xüsusilə evdə gürcü dilində danışılmayan ailələrdə dövlət dilini öyrənmək uşaqlar üçün çox vaxt çətin olur. Bir neçə aydır ki, Avropa İttifaqının dəstəyi ilə Qızılhacılı kəndində ilk həftəsonu məktəbi açılıb. Məktəb uşaqların dil biliklərini, erkən inkişafını və sosial inteqrasiyasını təşviq edir.

Layihə “Bərabərlik üçün bərabər imkanlar” təşkilatı tərəfindən “Uşaq, Ailə, Cəmiyyət” təşkilatı ilə birgə həyata keçirilir. Layihə, CENN-in dəstəyi ilə Kvemo Kartli və Samtsxe-Cavaxetidə icra olunan “İnklüziv və Yaşıl Post-Covid Bərpası üçün Vətəndaş Cəmiyyətinin Gücləndirilməsi” proqramı çərçivəsində Avropa İttifaqı tərəfindən maliyyələşdirilir.

Həftəsonu məktəbi layihəsinin rəhbəri Fidan Əsgərova qeyd edir ki, bu məkan yalnız uşaqların gürcü dilini öyrənməsi üçün deyil. Onlar ikidilli fəaliyyətlərdə iştirak edir, yeni bacarıqlar əldə edir, erkən inkişaflarını artırır və valideynlər də prosesdə fəal iştirak edirlər.

“Uşaq bağçalarında da ikidilli yanaşmalar mövcuddur, amma fərqimiz ondadır ki, mütəxəssislər bir-biri ilə əməkdaşlıq edirlər. Yəni gürcü, erməni və azərbaycan dili müəllimləri birgə plan hazırlayır və tədris dövründə nəzərdə tutulan iki saatlıq prosesi birlikdə həyata keçirirlər. Fəaliyyətlərə həm mobil, həm də stolüstü oyunlar daxildir. Məsələn, gürcü dili müəllimi bir qrupla, azərbaycan dili müəllimi digər qrupla işləyir. Mövzu eynidir, lakin biz bu layihə çərçivəsində mövcud metodologiyanı uyğunlaşdırmışıq. Buna görə də uşaqlar söz və cümlələr öyrənirlər. Hazırda 20 şagirdimiz var. Benefisiarlarımız əsasən 5-6 yaşlı, zərurət olduqda isə 7 yaşlı uşaqlardır. Həftəsonu məktəbinin məqsədi yalnız dil öyrətmək deyil. Uşaqlara daha sonra məktəbdə faydalı olacaq bacarıqlar öyrədilir. Biz bu layihə çərçivəsində məktəbəqədər təhsilə də diqqət yetiririk. Valideynlər övladlarının akademik bacarıqlarını, fəaliyyət planını, maraqlandırma üsullarını və uşaqları cihazlardan necə uzaqlaşdırmağı öyrənə bilərlər”, – deyə Fidan Əsgərova bildirir.

Marneulidə yaşayan valideyn Jalə Rüstəmova övladını həftəsonu məktəbinə yazdırıb. Onun fikrincə, bu məktəb uşaqların dil öyrənməsi, bacarıqlarını inkişaf etdirməsi və məktəbə hazırlaşması üçün vacib məkanlardan biridir.

“Marneulidə getdiyimiz ilk məkandır. Uşağımın gürcü dilini yaxşı öyrənməsi çox vacibdir. Evdə tapşırıqlarını yerinə yetirir, özü oxuyur və belə yerlərin olması çox önəmlidir. Çox bəyənirəm, çünki burada övladıma gündə iki saat vaxt ayırırlar. Əsas məqsəd isə odur ki, uşaqlar gürcü dilini yaxşı öyrənsinlər”, – Jalə Rüstəmova deyir.

CENN – ətraf mühitin mühafizəsi təşkilatı illərdir Kvemo Kartli bölgəsində, o cümlədən Marneulidə sosial sahədə fəaliyyət göstərir. Təşkilat Avropa İttifaqının dəstəyi ilə həftəsonu məktəbini maliyyələşdirib. Nəticədə məktəb lazımi təhsil resurslarına malik olub, müəllimlər təlim vasitəsilə ixtisaslarını artırmaq imkanı əldə ediblər və ərazidə açıq tədris məkanı yaradılıb.

CENN-in layihə meneceri Nino Tevzadzenin sözlərinə görə, 2022-ci ildən həyata keçirilən layihə çərçivəsində Kvemo Kartli və Samtsxe-Cavaxetidə 20-yə yaxın kiçik qrant ayrılıb.

“Əsasən bu layihələr sosial xidmətlərin keyfiyyətinin və əlçatanlığının yaxşılaşdırılmasına yönəlib. Yerli əhali ilə aparılan məsləhətləşmələr və ekspert araşdırmaları göstərdi ki, bir tərəfdən xidmətlər mövcuddur, lakin əhalinin, xüsusən də etnik azlıqların nümayəndələrinin onlar haqqında məlumatı azdır. Digər tərəfdən isə yerli səviyyədə qurulmuş xidmətlərə ehtiyac var. Marneuli bələdiyyəsində Avropa İttifaqının dəstəyi ilə yaradılan həftəsonu məktəbi məhz bu məqsədə xidmət edir. Burada 6-7 yaşlı uşaqlar gürcü dilini ikinci dil kimi öyrənir və məktəbə hazırlıq imkanı qazanırlar”, – Nino Tevzadze bildirib.

Hazırda Marneulinin Qızılhacılı kəndində ilk ikidilli həftəsonu məktəbi fəaliyyət göstərir. Tədris prosesində iştirak etmək istəyən hər kəs, təhsilinin istənilən mərhələsində bu layihəyə qoşula bilər.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.